उपप्रधान एवं गृहमन्त्री रवि लामिछानेले वन डढेलो तथा अग्नि पीडितलाई राहत दिने कुरामा ढिलाई नगर्न निर्देशन दिएका छन् ।
शुक्रबार गृह मन्त्रालयमा वन डढेलो तथा आगलागी नियन्त्रण र आउनसक्ने बाढीपहिरोको सम्भावित जोखिमको आकलन अभियानअन्तरर्गत ७७ जिल्लाका प्रमुख जिल्ला अधिकारीसँग अन्तरक्रिया कार्यक्रममा उनले कतैबाट नीतिगतरूपमा अप्ठ्यारो परेको छ भने आफूलाई भन्न आग्रह गर्दै तत्काल कुनै ढिलाई नगरी राहत र उद्धारको लागि निर्देशन दिएका हुन् ।
‘तत्काल राहतको लागि कुनै पनि ढिलाई नहोस् । यहाँ आम सर्वसाधारणले आलोचना गर्ने, सञ्चारमाध्यममार्फत हाम्रो कमजोरीहरू छताछुल्ल गर्ने काम भएपछि चासो दिने गरिन्छ । यो चाहिँ हुँदैन । मैले रोकेको छु भने मलाई अहिले भन्नुहोस् । सचिवले रोक्नुभएको छ भने यहाँ तत्काल भन्नुहोस् । कतैबाट नीतिगत रुपमा अप्ठ्यारो परेको छ भने भन्नुहोस् तर तत्काल कुनै ढिलाई नगरी राहतको र उद्धारको लागि काम गरिहाल्नुहोस्,’ गृहमन्त्री लामिछानेले भने ।
कतिपय ठाउँमा जनचेतनाको कुरामा सरकार चुकिरहेको कारण पनि वन डढेलो तथा आगलागी हुने गरेको उनको भनाइ छ । केही दिनयता देशका धेरै स्थानमा आगलागी भइरहेको घटना बाहिर आइरहेका छन् । केही स्थानमा वनको डढेलो गाउँ पसेपछि वस्ती नै सखाप भएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
