एकीकृत समाजवादी पार्टीका अध्यक्ष माधवकुमार नेपालले हचुवाको भरमा विकास निर्माणका काममा खर्च गर्ने प्रवृत्ति मौलाउँदै गएको उल्लेख गर्दै यसले प्रतिफल दिन नसक्ने बताएका छन् । 

काठमाडौंमा बुधबार कालिका खबरको १०औँ वार्षिकोत्सव तथा स्मारिका विमोचन कार्यक्रमलाई सम्बोधन गर्दै उनले बजेट निर्माण र लगानी गर्दा प्रतिफल प्राप्त हुने ठाउँलाई प्राथमिकता दिनुपर्ने बताएका हुन् । 

उनले भने, ‘हचुवा पाराले निर्माणका काम गर्ने कुराले प्रतिफल दिन सक्दैन । कहाँ, के कसरी लगानी गर्ने भन्नेबारे सोच्नुपर्ने आवश्यकता छ । हामीले बजेट निर्माणका क्रममा पनि प्रतिफल प्राप्त हुने ठाउँलाई प्राथमिकता दिनुपर्दछ । त्यहाँ खर्च गर्न सक्नुपर्दछ । यसबारे राज्यले गम्भीर भएर सोच्न जरुरी ठान्दछु ।’

नेपालमा युवा पलायनको तथ्याङ्क भयावह स्थितिमा पुगेको उल्लेख गर्दै उनले यसको समाधानका लागि शिक्षा क्षेत्रको सुधार जरुरी रहेको स्पष्ट पारे । उनले भने, ‘युवाहरू विदेश पलायनको तथ्याङ्क भयावह स्थितिमा पुगेको छ । हजारौँ युवाहरू एकै दिन विदेश पलायन भइरहेका छन् । यसको समाधानका लागि शिक्षा क्षेत्रको मोडलमा पनि काम गर्नु पर्दछ । मैले माथि बोलेका सबै कुराहरूको मूल कुरा भनेको उत्पादनमा वृद्धि नै हो ।’

त्यस्तै उनले पत्रकारिता संवेदनशील पेसा एवं समाजको प्रतिविम्ब भएको उल्लेख गर्दै उनले पछिल्लो समय सञ्चारमाध्यममा कुरूप अनुहारले मात्र चर्चा पाएको बताए । 

उनले अघि भने, ‘सञ्चारमाध्यमहरूमा कुरूप अनुहारहरू आउन थालेका छन् । यस्तो नहोस्, पत्रकारिता र सञ्चारमाध्यम एउटा गम्भीर पेसा हो । यसले समाजमा जागरण पैदा गर्ने, सचेतना जगाउने उद्देश्यमा समर्पित हुनुपर्ने आवश्यक छ । समाजमा राम्रा र नराम्रा कुराहरू पनि छन् । असल र खराब मानिसहरू पनि छ । चोर डाँकाहरू पनि छन्, साधुहरू पनि छन् । केमा जोड दिने भन्ने मुख्य कुरा हो । तपाईँको समाचारले नयाँ पुस्तालाई सोझै प्रभाव पार्ने भएकाले उद्देश्य प्रस्ट हुनुपर्दछ । सत्य र तथ्य हुनुपर्दछ ।’

पर्यटन व्यवसायदेखि जलवायु परिवर्तनसम्मका कुराहरूमा सञ्चारमाध्यमहरूमा जोड दिनुपर्ने उनको भनाइ थियो ।