कांग्रेस सभापति शेरबहादुर देउवाले १० जना नेतालाई केन्द्रीय सदस्यमा मनोनीत गरेका छन् ।
देउवाले रामचन्द्र पौडेल, प्रकाशमान सिंह, विमलेन्द्र निधि, विजयकुमार गच्छदार, कृष्णप्रसाद सिटौला, डा. प्रकाशशरण महत र डा. नारायण खड्कालाई मनोनीत गरेका हुन् ।
यस्तै, उमा रेग्मी, सुजाता कोइराला र मीनबहादुर विश्वकर्मा पनि मनोनीत भएका छन् ।
नेपाली कांग्रेसको विधान, २०१७ (संशोधन सहित) को धारा २१ को उपधारा (१०) अनुसार मनोनीत गरेको कांग्रेस मुख्यसचिव कृष्णप्रसाद पौडेलले बताए ।
मनोनीत भएकामध्ये पौडेल १४ औँ महाधिवेशन प्रक्रियाबाट अलग भएका थिए । उनले विज्ञप्तिमार्फत अस्वस्थ प्रतिस्पर्धा हुने भएपछि महाधिवेशनबाट अलग भएको जनाएका थिए ।
उनी १३ औँ महाधिवेशनमा देउवासँग सभापति पदमा पराजित भएका नेता हुन् । त्यसपछि वरिष्ठ नेताको हैसियतमा उनी रहे ।
मनोनीतमध्येका सिंह र निधि सभापतिमा पराजित भएका थिए । पहिलो चरणको सभापति पदको निर्वाचनमा सिंह तेस्रो र निधि चौंथो भएका थिए । दोस्रो चरणमा उनीहरूले देउवालाई समर्थन गरेर सभापति जिताएका थिए ।
नेता सिंह पार्टीको पूर्वमहामन्त्री हुन् । निधि निवर्तमान सभापति हुन् ।
अर्का नेता गच्छदार उपसभापति पदमा धनराज गुरुङसँग दुई मतले पराजित भएका थिए । नेतृ कोइराला पनि उपसभापति पदमै पराजित भएकी थिइन् ।
डा. महत भने महामन्त्री पदमा विश्वप्रकाश शर्मासँग पराजित भएका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।