बैतडीको सुर्नया–६ मा बीभत्स हत्या गरिएका आफ्ना कार्यकर्ता डम्मर अवस्थीका सबै हत्यारालाई कानुनी दायरामा ल्याउन माग गर्दै विप्लव नेतृत्वको नेकपाले सोमबार सुर्नया गाउँपालिका र वडा नं ६ को कार्यालय घेराउ गरेको छ ।
उनीहरुले आजै सतबाँझ–श्रीभावर सडकखण्ड केही समयका लागि अवरुद्ध समेत गरेका थिए । यस्तै सुर्नयाको सन्शेरीमाण्डौं बजारमा विरोध प्रदर्शन गरिएको नेकपाका सुर्नया सचिव अम्बादत्त अवस्थीले बताए ।
डम्मर अवस्थीको हत्यामा संलग्न सबैलाइ खोजी गरी कारबाही गर्नुपर्ने, पीडित परिवारलाई उचित क्षतिपूर्ति दिनुपर्ने, डम्मर अवस्थीलाइ सहिद घोषणा गर्नुपर्ने माग राख्दै सुर्नया ६ नं वडा कार्यालय र गाउँपालिका कार्यालय घेराउ गरिएको नेपाल कम्युनिस्ट पार्टीका जिल्ला सचिव रामसिंह कुँवरले बताए ।
डम्मर अवस्थीको हत्यामा संलग्न हरिश अवस्थीलाई पक्राउ गरी अनुसन्धान भइरहेको छ भने हत्यामा संलग्न भएको आशंकामा सुर्नया ६ कै नवराज अवस्थीलाइ समेत प्रहरीले नियन्त्रणमा लिएको छ । यस घटनाको विषयमा थप अनुसन्धान भइरहेको जिल्ला प्रहरी कार्यालयका प्रवक्ता प्रहरी निरीक्षक बोधराज ओझाले बताए ।
पीडित परिवारले भने परिवारको सुरक्षाको ग्यारेन्टीनहुँदा सम्म र बाँकी दोषी पत्ता नलाग्दासम्म शव नबुझ्ने बताउँदै आएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
