राष्ट्रिय क्रिकेट टोलीका प्रमुख बलर सन्दीप लामिछाने एकदिवसीय अन्तर्राष्ट्रियमा छिटो १ सय विकेट लिने बलर बनेका छन् । उनले यो विश्वकीर्तिमान काठमाडौंमा जारी एसिसी प्रिमियर कपअन्तर्गत ओमानविरुद्ध हासिल गरे । 

अदिल शफिकलाई १३ रनमा एल्बीडब्लु धरापमा पार्दै सन्दीपले ४२ खेलमा १ सय विकेट पूरा गरेका हुन् । योसँगै उनले अफगानिस्तानका स्टार राशिद खानको रेकर्ड भंग गरे । उनले ४४ ओडिआईमा १ सय विकेट पूरा गरेका थिए । 

विश्वकीर्तिमान बनाएको खेलमा सन्दीपले आफ्नो पहिलो ओभरमा एक रन दिएर महत्वपूर्ण २ विकेट लिए । उनले टोलीलाई तेस्रो सफलता दिलाउनेक्रममा कप्तान जीशान मक्सूदलाई पवेलियनको दिशा देखाए । 

नेपाललाई पहिलो सफलता दिलाउनेक्रममा स्पिनर ललितनारायण राजवंशीले ४.३ ओभरमा जतिन्दर सिंहलाई १५ रनमा बोल्ड गरे ।  

त्यसअघि कीर्तिपुरस्थित त्रिवि मैदानमा टस हारेर ब्याटिङको निम्तो पाएको नेपालले निर्धारित ५० ओभरमा ८ विकेट गुमाएर ३ सय १० रन बनायो । ओडिआईमा नेपालले कुनै पनि टोलीलाई दिएको यो अहिलेसम्मकै उच्च स्कोर हो ।

यसअघि नेपालले ओडिआईमा उच्च स्कोर आइसिसी विश्वकप लिग–२ मा पपुवा न्यूगिनी (पिएनजी) विरुद्ध बनाएको थियो । अघिल्लो महिना त्रिवि मैदानमा भएको खेलमा पिएनजीविरुद्ध नेपालले २ सय ९७ रन बनाएको थियो । 

ओमानलाई कीर्तिमानी लक्ष्य दिनेक्रममा युवा अलराउन्डर कुशल मल्लले आक्रामक शतकीय पारी खेले । ६४ बलको सामना गरेका उनले १० छक्का र ९ चौकासहित १०८ रन बनाए । कुशलले ५९ बलमा शतक पूरा गरेका थिए ।  

योसँगै उनी अब एकदिवसीयमा सर्वाधिक छिटो शतक बनाउने नेपाली ब्याटर बनेका छन् । एकदिवसीय अन्तर्राष्ट्रियमा कुशलको यो पहिलो शतक हो । जारी प्रतियोगिताको पहिलो खेलमा कुशलले अर्धशतकीय पारी खेलेका थिए ।   

त्यस्तै, ओमानविरुद्ध अर्का अलराउन्डर सोमपाल कामीले अर्धशतकीय पारी खेले । ४८ बल खेलेका उनले ९ चौकाको मद्दतमा अविजित रन बनाए । एकदिवसीयमा सोमपालको यो उच्च स्कोर हो । ओडिआईमा उनको दोस्रो अर्धशतक हो । 

यस्तै, भीम सार्कीले ३३, आरिफ शेखले २९ र कप्तान रोहित पौडेलले २३ रन जोडे । करण केसीले १५ बलमा २ चौका र १ छक्कासहित अविजित २९ रनको योगदान दिए । ओमानका लागि अयान खानले दुई, जतिन्दर सिंह, अकिब इलियास, जीशान मक्सूद, कलिमुल्लाह बिलाल खान र फैज बटले एक/एक विकेट लिए ।