नेपाली कांग्रेसका नेता ज्ञानेन्द्रबहादुर कार्कीले हिक्मत कार्की नेतृत्वको कोशी प्रदेश सरकार असारअगावै ढल्ने दाबी गरेका छन् ।
सुनसरीको इनरुवामा सोमबार देवानगञ्ज ठूलो मदरसाबाट बाबिया हुँदै हनुमान चौक सडक स्तरोन्नति शिलान्यास कार्यक्रममा बोल्दै पूर्वमन्त्री एवं कांग्रेस केन्द्रीय सदस्य कार्कीले असारसम्ममा कोशीमा एमाले नेतृत्वको सरकार ढल्ने बताएका हुन् ।
पुष्पकमल दाहाल नेतृत्वको सरकार ढालेर कांग्रेस र एमाले गठबन्धन सरकार गठन हुने चर्चा परिचर्चा हुने गरेको भन्दै नेता कार्कीले केन्द्र र प्रदेशमा वर्तमान गठबन्धन दलको सरकार पाँच वर्षसम्म कायमै रहने बताए ।
मुलुकमा अस्थिरता रहिरहोस् भन्ने एउटा तत्त्व रहेको र त्यसलाई परास्त नगरी देश समृद्धितर्फ अघि बढ्न नसक्ने उनको भनाइ थियो । उनले सत्ता गठबन्धन पूरै पाँच वर्षसम्म कायम रहने दाबी गरे ।
भारतीय सीमावर्ती क्षेत्र देवानगञ्ज गाउँपालिकाबाट सदरमुकाम इनरुवा जोड्ने २३ किलोमिटर सडकमध्ये १० किलोमिटर सडकको नेता कार्कीले शिलान्यास गरेका हुन् ।
कुल ३२ करोड ८३ लाखमा महावीर इञ्जिनियरिङ एन्ड कन्ष्टक्सनले ठेक्का पाएको उक्त सडकको तीन वर्षभित्र स्तरोन्नति गरिसक्ने बताइएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
