राष्ट्रिय महिला फुटबल टिमकी फरवार्ड सावित्रा भण्डारी ‘साम्बा’ को उच्च प्रदर्शनमा गोकुलम केरला इन्डियन वुमन्स लिग (आईडब्ल्यूएल) को फाइनलमा प्रवेश गरेको छ ।
गएराति सम्पन्न सेमिफाइनलमा इस्टर्न स्पोर्टिङ युनियनलाई ५–१ गाेल अन्तरले हराउँदै गोकुलम फाइनलमा प्रवेश गरेको हो । गोलमलाई फाइनलमा पुर्याउन सावित्राले दुई गोल गर्नुका साथै दुई असिस्ट गरिन् ।
यस्तै, इन्दुमति काथिरेसनले दुई तथा भिभिएन अडेजेईले एक गोल गरे । इस्टर्नका लागि युमनाम कमला देवीले १ गोल फर्काइन् ।
अहमदाबादमा भएको दोस्रो सेमिफाइनलमा गोकुलमले एक गोलले पछि परेको अवस्थामा पुनरागमन गर्दै फाइनलको यात्रा तय गरेको हो ।
खेलको १८ औँ मिनेटमा युमनाम कमला देवीले गोल गर्दै इस्टर्नलाई सुरुआती अग्रता दिलान् । तर, इस्टर्नको अग्रता लामो समय टिक्न सकेन । ३१ औँ मिनेटमा गोकुलमकी इन्दुमति काथिरेसनले बराबरी गोल गरिन् ।
पहिलो हाफको इन्जुरी टाइममा सावित्राले गोल गर्दै गोकुलमको अग्रता दोब्बर पारिन् । दोस्रो हाफमा गोकुलमले तीन गोल गर्यो ।
सावित्राकै पासमा ५५ औँ मिनेटमा भिभियन र ७० औँ मिनेटमा इन्दुमथिले गोल गरे । सावित्राले खेलको इन्जुरी टाइममा व्यक्तिगत दोस्रो गोल गरिन् ।
जारी लिगमा उनले ९ खेलमा ५ खेलमा ह्याट्रिकसहित सर्वाधिक २८ गोल गरेकी छन् । गोकुलमले अब उपाधिका लागि आइतबार नेपाली खेलाडीद्वय सरू लिम्बू र रेनुका नगरकोटेआवद्ध किकस्टार्ट एफसीको सामना गर्नेछ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
