प्रमुख प्रतिपक्ष दल नेकपा (एमाले)ले कोशी प्रदेशमा आफ्ना पार्टीका अध्यक्ष केपी शर्मा ओलीसहितका नेताहरूमाथि साङ्घातिक हमलाको निरन्तर प्रयास भइरहँदा पनि सरकार मूकदर्शक बनिरहेको आरोप लगाएका छन् ।

शुक्रबार प्रतिनिधिसभा बैठकको सुरुमै बोल्दै एमाले सचिव योगेश भट्टराईले सत्तापक्षकै कार्यकताहरूले बिहीबार (हिजो) पनि कोशी प्रदेशका एमालेका संसदीय दलका उपनेता राम राना र उपसभामुख सृजना दनुवारमाथि हातपात गर्ने, गाडी जलाउने लगायतको प्रयास गर्दा पनि सरकार रमिते बनिरहेको आरोप लगाउँदै त्यसको जवाफ सरकारसँग माग गरे । 

उनले सत्तापक्षकै कार्यकर्ताहरूले हाम्रो पार्टीका नेताहरूमाथि निरन्तर साङ्घातिक आक्रमण गर्दा पनि सरकार किन चुप लागेर बसिरहेको भनी प्रश्नसमेत गरे । उनले प्रदेशको नामकरण गर्ने विषय प्रदेशकै अधिकार भएकाले त्यस विषयलाई लिएर किन एमालेमाथि आक्रमण भइरहेको भनी आक्रोशसमेत व्यक्त गरे । 

प्रदेशको राजधानीको नामकरणको विषयलाई लिएर एमालेमाथि भइरहेको आक्रमणलाई सरकारले नियन्त्रणमा नलिने हो भने एमालेले संसद् बैठक सुचारु हुन नदिने सचिव भट्टराईको चेतावनी थियो । उनले मुलुकलाई जातीय, धार्मिक र साम्प्रदायिक ढंगले विभाजन गर्ने काम गरिएको भन्दै आफ्नो पार्टीलाई सह्य नहुने बताए । 

सचिव भट्टराईले भने, ‘यदि प्रदेशको नाम राख्ने कुरामा कुनै पार्टीलाई चित्त बुझेको छैन भने कोशी प्रदेशमा वैधानिक प्रक्रियाबाट दुई तिहाइ बहुमतबाट तपाई नाम परिवर्तन गर्नुस् हामीलाई त्यो स्वीकार्य छ । त्यो प्रक्रियाबाट आउनुस् । ढुंगामुढा गरेर हुँदैन । अराजकता सृजना गरेर हुँदैन । देशलाई जातीय हिसाबले विभाजन गर्ने, साम्प्रदायिक हिसाबले विभाजन गर्ने यो भन्दा दुखद कुरा केही पनि हुँदैन । ’

सचिव भट्टराईले एमालेलाई लखेट्ने प्रयास गरिएको जिकिर गर्दै त्यसको प्रतिवाद गर्नुपर्ने अवस्था आउन नदिन सरकारलाई सचेतसमेत गराए ।