संयुक्त राष्ट्रसंघले सुडानी शरणार्थीहरूको सङ्ख्या यो वर्षको अन्त्यसम्ममा दोब्बर हुनसक्ने चेतावनी दिएपछि युद्धग्रस्त सुडानका सेना प्रमुख दक्षिण सुडानका राष्ट्रपतिसँग वार्ता गर्न सोमबार राजधानी जुबाको भ्रमणमा छन् ।
गत १५ अप्रिलमा अर्धसैनिक बल र्यापिड सपोर्ट फोर्ससँग युद्ध सुरु भएपछि सेना प्रमुख अब्देल फताह अल–बुर्हानको यो दोस्रो विदेश भ्रमण हो । उनले दक्षिण सुडानका राष्ट्रपति साल्भा किरसँग भेटवार्ता गर्ने कार्यक्रम छ । यसअघि उहाँ इजिप्टको भ्रमणमा गएका थिए ।
सुडानका कार्यवाहक विदेशमन्त्री अली अल–सादिकले दुई दशक लामो गृहयुद्धपछि सन् २०११ मा स्वतन्त्रता हासिल गरेको दक्षिण सुडानले खार्तुममा जारी द्वन्द्वमा मध्यस्थता गर्नसक्ने बताएका छन् । ‘हामीलाई सुडानमा भएको द्वन्द्वको मध्यस्थता गर्न दक्षिण सुडान सबैभन्दा उपयुक्त देश हो भन्ने लाग्छ, किनकि हामी लामो समयदेखि एउटै देश रह्यौँ र हामी एकआपसमा परिचित छौँ, हामीलाई समस्याबारे जानकारी छ भने आवश्यकताबारे पनि अवगत छ,’ उनले एक विज्ञप्ति निकालेर भनेका छन् ।
सेना प्रमुख बुर्हानका पूर्वसहायक मोहम्मद हमदान डग्लोले नेतृत्व गरेको र्यापिड सपोर्ट फोर्स र सुडानी सेनाबीचको युद्ध राजधानी खार्तुम, पश्चिमी क्षेत्र डाफुरदेखि कोर्डोफान र जाजिरा राज्यसम्म फैलिएको छ । युद्धमा परी हजारौँको मृत्यु भएको छ भने लाखौँ पलायन भएका छन् ।
सशस्त्र द्वन्द्वका सम्बन्धमा अनुसन्धान गरिरहेको एक संस्थाका अनुसार हालसम्म ५ हजारभन्दा बढी सुडानीको मृत्यु भएको छ । यद्यपि मारिनेको वास्तविक सङ्ख्या योभन्दा धेरै भएको अनुमान गरिएको छ । संयुक्त राष्ट्र सङ्घीय निकायहरूले युद्ध चर्केपछि सुडानबाट चार करोड ६० लाख सर्वसाधारण विस्थापित भएका जनाएका छन् ।
युद्धबाहेक अत्यधिक गर्मी, अनियमित विद्युत् आपूर्ति, खाद्यान्न, औषधि र अन्य दैनिक उपभोग्य वस्तुको चरम अभावले सुडानका जनताको जीवन अति कष्टकर भएको छ । केही समयअघि सुडानका लागि संयुक्त राष्ट्रसंघका मानव अधिकारविज्ञ राधुआने नुइसरले युद्धको भयावह अवस्थाको चित्रण गर्दै पूरै देशलाई बन्धक बनाइएको बताएका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।