जिल्ला अदालत सुनसरीले सिद्धबाबा भनिने कृष्णदास गिरीलाई सफाइ दिएको छ । सुनसरीको चतराधामका धर्मगुरु गिरीले आफूलाई जबर्जस्ती करणी गरेको भन्दै एक महिलाले जिल्ला अदालत सुनसरीमा मुद्दा दायर गरेकी थिइन् ।
जिल्ला अदालत सुनसरीका न्यायाधीश हरिप्रसाद कोइरालाको इजलासले अभियोग दाबी नपुग्ने भन्दै बुधबार सो मुद्दाबाट गिरीलाई सफाइ दिएको हो । अदालतले अभियोग दाबी नपुगेको फैसला गरेको सुनसरी जिल्ला अदालतका तहसिलदार भरतमणि पोखरेलले बताए ।
यसअघि गिरीले ०७७ मंसिर २२ गते जिल्ला अदालत सुनसरीबाट सफाइ पाएका थिए । तत्कालीन न्यायाधीश अर्जुनप्रसाद कोइरालाको इजलासले उनलाई सफाइ दिएको थियो । उच्च अदालत विराटनगरका कामु मुख्य न्यायाधीश सत्यमोहन जोशी थारु र किरणकुमारी गुप्ताको संयुक्त इजलासले पुनर्विचार गर्न भन्दै जिल्लामा मुद्दा फर्काएको थियो ।
आफूलाई पीडित दाबी गरेकी महिलाले ०७६ कात्तिक ४ गते राति सिद्धबाबाले जबरजस्ती करणी गरेको दाबी गर्दै ०७६ मंसिर ११ गते जिल्ला प्रहरी कार्यालय सुनसरीमा जाहेरी दिएकी थिइन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
