इरानका विदेश मन्त्रालयका प्रवक्ता नासेर कनानीले इरानले इस्लामिक सहयोग संगठन (ओआईसी) सँग इजरायली युद्ध अपराधलाई दस्तावेज गर्न अन्तर्राष्ट्रिय वकीलहरू सम्मिलित एक विशेष समिति गठन गर्न प्रस्ताव गरेको बताएका छन् ।
अन्तर्राष्ट्रिय संस्थाहरूमा पेस गर्नका लागि विशेष समिति गठनको आवश्यकता रहेको बताए । प्यालेस्टिनीहरू र विशेष गरी गाजाका जनताविरुद्ध इजरायली अपराधहरूको प्रतिरोध गर्न इरानको कानुनी उपायहरूको बारेमा उल्लेख गर्दै उनले इरानको राजधानी तेहरानमा यस्तो बताएका हुन् ।
कनानीले १८ अक्टोबरमा जेद्दाहमा भएको ओआईसीको कार्यकारी समितिको आपतकालीन बैठक र सोही दिन ओआईसीका महासचिव हिसेन ब्राहिम ताहासँगको भेटमा इरानी विदेशमन्त्री होसेन अमिर अब्दुल्लाहियानले यो प्रस्ताव राखेको बताए ।
उनले इरानी विदेशमन्त्रीले विगत सात दशकमा इजरायलले गरेको ‘युद्ध अपराध’ र विशेष गरी गाजा विरुद्ध विगत तीन हप्तामा भएका सान्दर्भिक प्रमाणहरू सङ्कलन गरी पेस गर्ने आधार तयार गरी अभिलेखीकरण गर्न समिति गठन गर्नुपर्नेमा जोड दिए ।
अपराधीहरू र उनीहरूलाई समर्थन गर्नेहरूलाई कारबाही गर्न अन्तर्राष्ट्रिय न्यायालय लगायत जिम्मेवार अन्तर्राष्ट्रिय संस्थालाई कागजात र प्रमाणहरू पेश गर्न आवश्यक रहेको उनको भनाइ छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।