भुकम्पले भत्काएको आठ वर्षपछि उच्च अदालतको क्षतिग्रस्त भवन निर्माण हुँदैछ । पोखरा उच्च अदालतको बाग्लुङस्थित इजलासको उक्त भवन दुई चरणमा काम भइरहेकाले  निर्माणले तीव्रता पाएको हो ।

६ तलाभन्दा बढीको पूर्ण आपांगमैत्री भवनमा अहिले  चौथो तलाको काम भइरहेको  छ  । अदालतको भवन २०७२ सालको भूकम्पले भत्काएपछि पहिलो पटक दुईवटा विद्युतीय भर्याङसहित नमूना भवन निर्माण गर्न लागिएकाे हाे ।

हालसम्म भवनको ४० प्रतिशत काम सम्पन्न भइसकेको र  सोही भवनसँगै जोडिएको मुख्य आवास गृहको पहिलो तला  पनि ढलान भएको निर्माण कम्पनीले जनाएकाे छ । मुख्य भवनको मात्रै निर्माणको काम ६० प्रतिशत भए पनि भवन तथा तीन वटा आवास गृह निर्माणका हिसाबले पूरै योजनाको ४० प्रतिशत सम्पन्न भएको हो ।

सम्झौता भएको ११ महिनामा चौथो तलाको ढलान भइरहेकाले सम्झौताअघि नै निर्माणकाे काम सकेर बुझाइने निर्माण कम्पनीले जनाएको छ । उक्त भवन ३० महिनामै सक्नेगरी २०७९ मंसिर १६ गते श्यामसुन्दर पशुपति शिवजी निर्माण कम्पनीले ५७ करोडमा ठेक्का पाएको थियो ।

भवन निर्माणका लागि अत्याधुनिक उपकरण प्रयोग गर्नुका साथै दिन र रातमा गरी दुई चरणमा निर्माणको काम भइरहेको ठेकेदार ओम गुरुङले जानकारी दिए ।

उनले भने, ‘पुरानो भवन भत्काउनेदेखि नयाँ भवनको भूइँतलाको लागि माटो व्यवस्थापनमा समय लाग्यो, अहिले दिनरात गरी दुई चरणमा काम भइरहेको छ, यति ठूलो भवन ३० महिनामै सक्नु चुनौतीपूर्ण हो तर हामीसँग प्रविधि र जनशक्ति दुवै छ । ५७ करोड लागतको भवन दिनमा मात्रै काम गरे पाँच वर्ष लाग्छ, दिनरात काम गरेर ३० महिना अगावै सक्नु आवश्यक छ ।’

भवन निर्माणका लागि आवश्यक कच्चा सामग्री रेडिमिक्सको सहायताबाट तयार पारी प्राविधिक जाँच गरेपछि मात्रै प्रयोगमा ल्याइने गरिएको छ । श्रमिकलाई समेत आवसीय सुविधासहित भवन निर्माणस्थलमै राखिएको छ ।

बागलुङ इजालसका सूचना अधिकारी शिवप्रसाद गौतमका अनुसार भवन निर्माणको कार्यप्रगति सन्तोषजनक रहेको अन्य निर्माणमा जस्तो निर्माण व्यवसायीले यो भवन निर्माणमा ढिलासुस्ती नगरेकाले समय अगावै सकिने देखिएकाे छ ।

उनले भने, ‘अहिले उक्त इजलासको काम यहाँस्थित जिल्ला अदालतको भवनबाटै भइरहेकाले हामीलाई छिटोभन्दा छिटो भवन निर्माणको काम सकेर सेवा दिन आवश्यक छ ।’ अन्डरग्राउण्डसहित साढे छ तलाको उक्त भवनसँगै अथिति गृह र कर्मचारी आवाससमेत तीन ब्लकमा हुनेछ ।

सात रोपनी जग्गामा निर्माण भइरहेको उक्त  भवन प्रविधिमैत्री, अपांगमैत्री, भूकम्प प्रतिरोधीका साथै  साविक धौलागिरि अञ्चलका चार जिल्लामध्ये सबैभन्दा ठूलो र आधुनिक हुने सघन सहरी तथा भवन निर्माण कार्यालयले जनाएको छ । सो भवनमा ६ वटा अत्याधुनिक इजलास कक्ष रहने छन् ।