महिला, बालबालिका तथा ज्येष्ठ नागरिक मन्त्री सुरेन्द्रराज आचार्यले भृकुटीमण्डपको व्यवस्थापनमा राज्यले समुचित ध्यान दिन नसकेको पाइएको बताएका छन् ।
भृकुटीमण्डप हाताभित्र अवस्थित खुल्ला बजारको ३२ औँ स्थापना दिवस तथा बृहत् रक्तदान कार्यक्रममा आज सहभागी बनेका उनले भने, ‘नियम कानुनले हुने काम छिटै गरिनुपर्छ ।’
समाज कल्याण परिषद्अन्तर्गत रहेको भृकुटीमण्डपमा सुधारका कामहरू गर्नुपर्ने भएको मन्त्री आचार्यले बताए ।
‘भृकुटीमण्डपको अवस्था सुधार र यहाँ रहेका व्यवसायीहरूको माग सम्बोधन गर्नुपर्छ भनेर भनेको थिएँ, त्यसैको परिणामस्वरुप यस पटक बजेट अलि बढी छुट्टिएको छ । बजेट छुट्याउने मात्रै होइन त्यसको कार्यान्वयनमा पनि परिणाम देखिनु पर्छ,’ आचार्यले भने ।
छुट्याइएको बजेटबाट यसै वर्ष ५/७ सय स्टलहरूको निर्माण सुरु हुनुपर्ने उनले बताए । ‘यहाँका अध्यक्ष लगायत तीन सदस्य समाज कल्याण परिषद्का सदस्य सचिव र विभागीय प्रमुखहरू दुर्गा भट्टराई र दीपेन्द्र पन्तसहित ६ जनाको एउटा समूह बसेर यहाँको समस्या बुझ्नुपर्छ,’ उनले भने, ‘यो कुनै १०/१५ दिनको कुरा होइन । समस्या के छ बुझेर निकास दिनु पर्छ ।’
नियमले गरिनुपर्ने काम तत्काल हुनुपर्ने उनले धारणा छ । भृकुटीमण्डपको अवस्था सुधारका लागि हुनुपर्ने काममा राज्यकै तर्फबाट कमी कमजोरी भएको देखिएको उनको भनाइ थियो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।