नेपाली कांग्रेसका नेता डा. शेखर कोइरालाले मन्त्रीहरू मात्रै फेरेर नहुने प्रधानमन्त्री नै परिवर्तन गर्नुपर्ने बताएका छन् । पाँचथर सदरमुकाम फिदिममा पत्रकारहरूसँग कुरा गर्दै कोइरालाले प्रचण्ड नेतृत्वको सरकार तत्काल परिवर्तन गर्नुपर्ने अवस्था आएको बताएका हुन् ।
प्रधानमन्त्री आफैँले काम गर्न नसकेको बताउन थालेको उललेख गर्दै कोइरालाले भने, ‘प्रधानमन्त्रीले मन्त्रीहरूको रिपोर्ट कार्ड माग्नुभएको छ । म प्रधानमन्त्रीजीको रिर्पोट कार्ड माग्छु ।’
दण्डहीनता र भ्रष्टाचार अन्त्य गराउन प्रधानमन्त्री असफल भएको आरोप लगाउँदै उनले धार्मिक, सांस्कृतिक, राजनीति रुपमा चारैतिर अराजकता फैलिएको बताए ।
कोइरालाले भने, ‘यो सरकार परिवर्तन गर्नुपर्ने नै भएको छ । कांग्रेसको नेतृत्वमा सरकार आयो भने जनतालाई भरोसा दिलाउन सकिन्छ ।’ गणतन्त्र, संघीयता र समावेशितामाथि नै आक्रमण भएको भन्दै उनले यो आक्रमण गणतन्त्र, संघीयताप्रति नभई सबै दलको नेतृत्वप्रतिको आक्रमण, निराशा, आक्रोश भएको उनले बताए ।
एनसेललगायत काण्ड सामसुम बनाउन खोजिएको उल्लेख गर्दै उनले भने, ‘नयाँ नयाँ काण्ड आउँछन् । अगाडि बढ्दै जाँदा सामसुम हुन्छ । माथिल्लो माथिल्लो व्यक्तिमा आएपछि लुक्छ । एनसेलको अवस्था पनि यही छ ।’
नेता, कर्मचारी र व्यापारी नमिली ठूला भष्ट्रचार हुन नसक्ने ठोकुवा गर्दै कोइरालाले मूल सफा नभएसम्म सबैतिर सफा नहुने बताए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
