आइसिसी क्रिकेट विश्वकप लिग–२ को त्रिकोणात्मक सिरिजमा नामिबियाविरुद्ध नेपाली टिमका ओपनिङ ब्याटर आसिफ शेखले अर्धशतक पूरा गरेका छन् । उनले ५५ बलमा ८ चौका र एक छक्काको मद्दतमा अर्धशतक पूरा गरेका हुन् ।
आसिफको यो लगातार दोस्रो अर्धशतक हो । योसँगै उनले इतिहास रचेका छन् । आसिफ अब नेपालका लागि ओडिआईमा १२ अर्धशतक बनाउने एक्लो ब्याटर बनेका छन् ।
उनले पछिल्लो खेलमा नेदरल्याण्ड्सविरुद्ध अविजित ५४ रनको पारी खेलेका थिए ।
अनिल र देव डकआउट
नामिबियाविवरुद्ध अनिल साह र देव खनाल शून्यमै आउट भए । देव आठौँ ओभरको अन्तिम बलमा तथा अनिल उनी ६.४ मा शून्यमै आउट भएका हुन् । देवलाई ज्याक ब्रासेलले विकेटकिपरबाट क्याच आउट गराए । अनिल बर्नार्ड स्कोल्ट्जको बलमा आउट भए । यही ओभरको दोस्रो बलमा कुशल भुर्तेल आउट भए ।
उनी ६.२ ओभरमा स्पिनर बर्नार्ड स्कोल्ट्जको बलमा एल्बीडब्लू आउट भएका हुन् । कुशलले आज १६ बलमा तीन चौकासहित १८ रन जोडे । कीर्तिपुरस्थित त्रिवि मैदानमा भइरहेको खेलमा नेपालले टस हारेर पहिला ब्याटिङ गरिरहेको हो ।
नेपालले आज प्लेइङ–११ मा एक खेलाडी परिवर्तन गरेको छ । नेपालले नामिबियाविरुद्ध गुलशन झालाई विश्राम दिएर करण केसीलाई मौका दिएको हो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।