राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले नेता ठाकुरमोहन श्रेष्ठमाथि अप्रत्याशीत आक्रमण भएको भन्दै प्रहरीलाई अनुसन्धान गर्न आग्रह गरेको बताएका छन् ।
आइतबार बिहान पार्टी केन्द्रीय कार्यसम्पादन समितिको बैठक जारी रहँदा पार्टी कार्यालय धुम्वाराहीमा श्रेष्ठमाथि आक्रमणको घटना भएको थियो । घटनापछि अध्यक्ष लिङ्देनले पार्टीका पदाधिकारीलाई अप्रत्याशीत रुपमा आक्रमण भएका भएको भन्दै बैठकले त्यसप्रति खेद प्रकट गरेको उल्लेख गरे ।
‘झडपको कुरा आयो, त्यो अप्रत्याशीत रुपमा भयो । किन भयो भन्ने खोजी भइरहेको छ । राजनीतिक पदाधिकारीको प्रसंगभन्दा अलग भएकाले प्रहरीलाई हामीले अनुसन्धान गर्न आग्रह गरिसकेका छौँ । बैठकले त्यसप्रति खेद प्रकट गरेको छ,’अध्यक्ष लिङ्देनले सञ्चारकर्मीसँग भने, ‘पार्टी कार्यालयभित्र पार्टीका पदाधिकारीलाई अप्रत्याशीत रुपमा आक्रमण भएको छ । सिसिटिभी, सञ्चारमाध्यममा आएको भिडियो समेतलाई लिएर अनुसन्धान गरेर कारबाही गर्न प्रहरीलाई आग्रह गर्ने भन्ने समेत बैठकमा निर्णय भइसकेको छ ।’
यसअघि पार्टीको बैठकमा श्रेष्ठले पूर्वमन्त्रीसमेत रहेका विक्रम पाण्डेलाई भ्रष्टचारीको संज्ञा दिँदै कडा रूपमा आलोचना गरेका थिए । श्रेष्ठले आफूलाई भ्रष्टाचारी भनेपछि पाण्डे बैठकबाट बाहिरिएका थिए । पाण्डे बाहिरिएपछि केही समयका लागि बैठक स्थगित भएको थियो । स्थगित बैठकबाट बाहिर निस्कन लाग्दा श्रेष्ठमाथि आक्रमण भएको हो ।
घटनामा ठाकुरमोहनको जिउमा चोटपटक लागेको छ । ठाकुरमोहन पूर्वएआइजी हुन् । उनी आफ्नो नेतृत्वको पार्टी राप्रपामा विलय गराएपछि केन्द्रीय कार्यसम्पादन समिति सदस्य बनेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
