टोकियो ओलम्पिक अन्तर्गत महिला फुटबलमा शुक्रबार भएका आ-आफ्नो खेलमा जित हात पार्दै अस्ट्रेलिया र क्यानडा सेमिफाइनल प्रवेश गरेका छन् ।
अस्ट्रेलियाले बेलायतमाथि अतिरिक्त समयमा ४-३ को रोमाञ्चक जित दर्ता गर्यो ।
इबराकी काशिमा रंगशालामा निर्धारित ९० मिनेट भित्र दुवै टोलीले २-२ गोल गरेपछि खेल अतिरिक्त समयमा धकेलिएको थियो ।
अस्ट्रेलियाको जितमा साम केरले २, एलन्ना केनेडी र मेरी फुलरले १/१ गोल गरे । बेलायतका लागि एलेन ह्वाइटले ह्याट्रिक पूरा गरिन् ।
खेलको ३५ औँ मिनेटमा केनेडीले गोल गर्दै अस्ट्रेलियालाई अग्रता दिलाएकी थिइन् । त्यसपछि ह्वाइटले ५७ र ६६ औँ मिनेटमा गोल गर्दा बेलायत २-१ ले अगाडि बढ्यो ।
८९ औँ मिनेटमा केरले गोल गर्दै अस्ट्रेलियालाई २-२ को बराबरीमा ल्याइन् । १०३ औँ मिनेटमा फुलर र १०६ मिनेटमा केरले गोल गर्दै टोलीलाई ४-२ को अग्रता दिलाए ।
११५ औँ मिनेटमा ह्वाइटले ह्याट्रिक गर्दै बेलायतलाई खेलमा फर्काउने प्रयास गरे पनि त्यो पर्याप्त बन्न सकेन ।
शुक्रबार नै मियागी स्टेडियममा क्यानडाले ब्राजिललाई पेनाल्टी सुट आउटमा ४-३ गोल अन्तरले पराजित गर्यो ।
निर्धारित ९० मिनेट र अतिरिक्त समय गोलरहित बराबरीमा सकिएपछि खेलको निर्णय पेनाल्टी सुट आउटबाट भएको हो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
