सहिद स्मारक ए डिभिजन लिगअन्तर्गत आइतबारको खेलमा विभागीय टाेली त्रिभुवन आर्मी फुटबल क्लब र थ्रीस्टार क्लब बराबरीमा राेकिएका छन् ।
दुवै टाेलीले त्रिपुरेश्वरस्थित दशरथ रंगशालामा गाेलरहित बराबरी खेलेका हुन् ।
याे बराबरीसँगै आर्मीको एएफसी कप छनोट खेल्ने सम्भावना पनि सकिएको छ ।
आर्मीलाई एएफसी कप छनाेटकाे सम्भावना जीवितै राख्न आजकाे खेलमा जित अत्यावश्यक थियो ।
अब छनोटको दौडमा साविक विजेता मछिन्द्र र मनाङ रहेका छन् ।
गत संस्करण लिग विजेता मछिन्द्रसँग एएफसी क्लब लाइसेन्स नभएको कारण आर्मीले एएफसी कप छनोट खेलेको थियो ।
दुवै टाेलीले पाएका केही अवसरलाई सदुपयोग गर्न नसक्दा अंक बाँड्न बाध्य बने ।
खेलकाे १७ औं मिनेटमा आयुष घलानको प्रहार पाेस्ट नजिकैबाट बाहिरिँदा थ्रीस्टार अग्रता लिनबाट चुक्यो ।
३६ औँ मिनेटमा सन्तोष तामाङको फ्रिकिकमा पदमबहादुर तामाङको प्रहार पोलमा लागेर फर्कंदा आर्मीले अग्रता लिन सकेन ।
याे नतिजासँगै ६ खेलमा १० अंक जाेडेकाे आर्मी चाैथाे स्थानमा रहँदा ७ अंकका साथ थ्रीस्टार साताैँ स्थानमा उक्लिएकाे छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
