नेपालमा अवैध रहेको क्रिप्टो करेन्सीको कारोबार गरेको आरोपमा दुई जनाविरुद्ध राजस्व अनुसन्धान विभागले मुद्दा दायर गरेको छ।
मोबाइल एप्लिकेसन वनएक्सवेट, बिनान्स, एडिभी क्यास, क्वाइनबेस र प्याक्सफुलको प्रयोग गरी नेपाली बैंकबाट ९ करोड ७४ लाख ६९ हजार ९८३ रुपैयाँ ठगी गर्ने गरेको आरोपमा विभागले मुद्दा दायर गरेको हो ।
विभागले मोरङका २८ वर्षीय पुस्कर श्रेष्ठ र बिनिता लिम्बूविरुद्ध काठमाडौं जिल्ला अदालतमा मुद्दा दायर गरेको हो । विभागले दुवैसँगबाट ९ करोड ७४ लाख ६९ हजार ९८३ रुपैयाँ बिगो मागदाबी गरेको छ ।
श्रेष्ठले मेगा बैंकबाट ८६ लाख ८३ हजार ४२९ रुपैयाँ, सिटिजन्स बैंकबाट २ करोड ५१ लख ७६ हजार ९९ रुपैयाँ, एनआईसी एशिया बैंकबाट १ करोड ८२ लाख ४९ हजार ८८९ रुपैयाँ र राष्ट्रिय वाणिज्य बैंकबाट २ करोड ३६ लाख ६२ हजार ५३९ रुपैयाँ गरी जम्मा ७ करोड ५७ लाख ७१ हजार ९५८ रुपैयाँ ठगी गरेको पाइएको विभागले जनाएको छ ।
त्यस्तै, लिम्बूले राष्ट्रिय वाणिज्य बैंकबाट २ करोड १६ लाख ९८ हजार २४ रुपैयाँ ठगी गरेको अनुसन्धानका क्रममा खुलेको विभागले जनाएको छ । उनीहरूले वानएक्स, बिनान्स, एडीभी क्यास, क्वाइनबेस र प्याक्सफुलमार्फत रकम लोड तथा अनलोड गरी अमेरिकी डलर सटही तथा क्रिप्टोमा लगानी गर्नेको विभागले जनाएको छ । उक्त कार्य विदेशी विनिमय ऐन २०१९ अनुसार गैरकानूनी रहेको विभागको भनाइ छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।