भौतिक पूर्वाधार तथा यातायात मन्त्री मोहम्मद इश्तियाक राईले नेताको नाम लिएर विकास निर्माणमा बेथिति निम्त्याउने ठेकेदारहरूलाई तह लगाउने चेतावनी दिएका छन् । सोमबार प्रतिनिधि सभा अन्तर्गतको विकास तथा प्रविधि समितिको बैठकमा बोल्दै मन्त्री राईले नेताको नाम लिएर ठेकदारीमा दादागिरी गर्दै विकास निर्माणका काममा बेथिति ल्याउने ठेकेदारहरूलाई तह लगाउने चेतावनी दिएका हुन् । 

उनले मन्त्रालयले त्यस्ता ठेकेदारहरूको खोजी भई रहेकाले बिस्तारै ठिक लगाउने बताए  । मन्त्री राईले ठेक्का लिने तर समयमा नै काम सक्ने र अन्य विभिन्न बेथिति ल्याउने ठेकेदारहरूलाई सरकारले नछोड्ने बताए । उनले कुनै पनि नेताको नजिकको ठेकदार भए पनि काममा अवरोध सिर्जना गरेमा नछोड्ने बताए । अहिले वैकल्पिक राजमार्गको विषयमा पनि बेथिति भइरहेको उनको भनाई छ । मन्त्री राईले मन्त्रीपरिषद्ले वैकल्पिक सहायक राजमार्गका बारेमा निर्णय गरिसकेकाले अब सहायक राजमार्गको मापदण्ड बनाएर कार्यान्वयन गर्ने प्रतिबद्धता जनाए । 

‘गल्ती गर्ने ठेकेदारहरूलाई छोड्ने कुरा आउँदैन । सरकार कुनै पनि नेताको आडमा बसेर विकास निर्माणमा बेथिति निम्त्याउनेलाई छोड्दैनौँ । तर विकास निर्माणमा ठेकेदारहरूको बेथिति छ,’ उनले भने,  ‘को कसको को कसको भन्ने ठेकेदारहरूले विभिन्न नेताहरूको खोल ओढेर ठेकेदारहरूले बेथिति निम्त्याएका छन् । हामी त्यसको खोजी गर्दैछौँ । बिस्तारै ठिक पार्छौँ । तपाईँहरू ढुक्क हुनुस् ठिक पार्छौँ  ।’

मन्त्री राईले सार्वजनिक यातायातमा वैज्ञानिक भाडा दरमा बेथिति नभएको बताए । उनले स्वचालित मूल्य प्रणाली अनुसार नै भाडा समायोजन भई रहेको दाबी गरे । उनले भने, ‘सार्वजनिक यातायातमा वैज्ञानिक भाडा दरको कुरा उठ्यो । सार्वजनिक यातायातमा वैज्ञानिक भाडा दरमा बेथिति चाहिँ छैन । लागू हुने/नहुने कुरामा कतै गुनासो आयो भने कडाइका साथ लगाउँछौँ ।’