चुनावको मुखमा खोटाङमा जनता समाजवादी पार्टी र नेकपा एमालेका ४४ नेता तथा कार्यकर्ता माओवादी केन्द्र प्रवेश गरेका छन् । जनता समाजवादीका ३८ जना र एमालेका छ जना नेता तथा कार्यकर्ता बिहीबार पत्रकार सम्मेलन गर्दै माओवादी केन्द्र प्रवेश गरेका हुन् ।
समाजवादी विद्यार्थी युनियनका केन्द्रीय सचिवालय सदस्य, १ नम्बर प्रदेश समिति अध्यक्ष तथा जसपा खोटाङका प्रचार विभाग प्रमुख रबिन खम्बूको नेतृत्वमा जसपाका विभिन्न जिम्मेवारीमा रहेका नेता तथा कार्यकर्ता माओवादी केन्द्र प्रवेश गरेका छन् ।
यस्तै, समाजवादी युवा संघ खोटाङका अध्यक्ष एवं जसपाका पार्टी उत्पादन तथा स्वरोजगार विभाग प्रमुख गजेन्द्र राई, जसपाका सचिवालय सदस्य एवं दिप्रुङ चुईचुम्मा गाउँपालिका अध्यक्ष पृथ्बीकुमार राई, जिल्ला सचिवालय सदस्य मेघराज राई, प्रवास समिति कतारका उपाध्यक्ष गजेन्द्र खालिङ राई, दिक्तेल रुपाकोट मझुवागढी नगर समिति सह–सचिव सौराज राई, जसपा खोटाङ–काठमाडौं सम्पर्क समितिका प्रज्वल राईलगायतका नेता तथा कार्यकर्ता माओवादी केन्द्र प्रवेश गरेका छन् ।
नेतृत्वले पार्टीलाई प्रतिक्रियावादी कित्तामा पुर्याउँदै प्रतिगमनका मतियार मानिएको एमाले र राप्रपाजस्ता यथास्थितिवादी दलसँग सहकार्य गरेकाले पार्टी परिवर्तन गरेको खम्बूले पत्रकार सम्मेलनमा बताए ।
‘पार्टीको नीति, विचार र सिद्धान्त विपरित नेतृत्वले मनोमानी निर्णय गर्दै सही दिशा दिन सकेन,’ खम्बूले भने, ‘सैद्धान्तिक वैचारिक पथमा विचलन आई व्यक्तिवादी प्रवृत्ति हावी भएको ठहर गर्दै हामीले पार्टी छाडेर माओवादी केन्द्रमा समाहित भएका हौँ ।’
एमाले जिल्ला कमिटि सदस्य जयप्रसाद (जेपी) आचार्य, दिक्तेल रुपाकोट मझुवागढी नगरपालिका–८ वडा कमिटी अध्यक्ष रविन्द्रकुमार राई, वडा कमिटी सदस्य जीतबहादुर राई, दीपेन्द्र राई, नवराज भुजेल र समर्थक मणिराज राई पनि माओवादी केन्द्र प्रवेश गरेका छन् ।
जसपा र एमाले छाडेका नेता तथा कार्यकर्तालाई माओवादी केन्द्रका पोलिटब्युरो सदस्य, संविधानसभा सदस्यका उम्मेदवार एवं प्रदेश १ का खानेपानी, सिँचाइ तथा ऊर्जामन्त्री रामकुमार राई, पोलिटब्युु सदस्य समिता कार्की, वैकल्पिक केन्द्रीय सदस्य ध्रुव बुढाथोकी, प्रदेश कमिटी उपाध्यक्ष देवान किराती, जिल्ला संयोजक दीपक पाण्डे, प्रदेश कमिटी सदस्य टंक थापा, विनोद आचार्य, जीवन राई लगायतले पार्टीमा स्वागत गरेका थिए ।
जनता समाजवादी पार्टी खोटाङका तत्कालीन अध्यक्ष टंक थापासहितका नेता माओवादी केन्द्र प्रवेश गरेको अढाई महिनापछि थप नेता तथा कार्यकर्ताले जसपा छाडेका हुन् ।
गत साउन ३० गते जसपा परित्यागको घोषणा गरेका ३९ नेता तथा कार्यकर्तामध्ये थापासहितका १३ जना भदौ १ गते माओवादी केन्द्र प्रवेश गरेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
