भरतपुर महानगरपालिकाले आर्थिक वर्ष २०८०–८१ का लागि ६ अर्ब ३१ करोड ७९ लाख ९० हजार बजेट प्रस्तुत गरेको छ । महानगरको १३औँ नगरसभामा नगर उपप्रमुख चित्रसेन अधिकारीले सो रकम बराबरको बजेट प्रस्तुत गरेका हुन् । 

भरतपुर महानगरको आन्तरिक आयतर्फ एक अर्ब ७५ करोड, अन्तरसरकारी वित्तीय हस्तान्तरबाट एक अर्ब ८३ करोड ९९ लाख ७५ हजार, केन्द्र तथा बागमती प्रदेश सरकारको राजस्व बाँडफाँटबाट प्राप्त ५४ करोड ८० लाख १५ हजार, जनसहभागिताबाट ५० करोड, बैैंक मौजात एक अर्ब ६५ करोड, सडक बोर्ड नेपालबाट तीन करोड रहने प्रक्षेपण गरिएको छ । 

अन्तरसरकारी अख्तियारी शीर्षकमा अनुमानित एक अर्ब १० करोड रहने प्रक्षेपण गरिएको अधिकारीले नगरसभामा जानकारी दिए । चालू आर्थिक वर्षमा निर्माण सम्पन्न हुन नसकेका तथा भुक्तानी बाँकीमा रहेका र क्रमागत एवं बहुवर्षीय ठेक्का भएका योजनाहरु समयमै सम्पन्न गर्न एकमुष्ट एक अर्ब ६५ करोड बजेट विनियोजन गरिएको छ ।

हरेक वडाको समानुपातिक विकासका निम्ति सम्बन्धित वडास्तरबाट नै कार्यक्रम कार्यान्वयन हुने व्यवस्था मिलाइनेछ । यसरी कार्यान्वय हुने योजनाहरुका लागि प्रत्येक वडाका लागि दुई करोड ७५ लाखको दरले जम्ममा ७९ करोड ७५ लाख प्रस्ताव गरिएको छ । 

महानगरपालिकाका ठूला तथा रणनीतिक महत्वका पूर्वाधार निर्माणका लागि समपूरक साझेदारी कोष स्थापना गरी कार्यान्वयनमा ल्याउन १० करोड, महानगरभित्र स्मार्ट सार्वजनिक शौचालय निर्माण, फाउन्डेसनसहितको मेसजाली निर्माण, हरियाली सहितको नमुना सडक निर्माण, सिँचाइ, कल्भर्ट, ग्राभेल, ह्युमपाइप खरिद, ओभरहेड ब्रिज निर्माण, परियोजना बैैंक निर्माण लगायतका सहरी सौन्दर्य र भू–उपयोग तथा बस्ती विकाससम्बन्धी नीति कार्यान्वयन गर्न एकमुष्ट १६ करोड विनियोजन गरिएको छ । 

आर्थिक वर्ष २०७९–८० मा स्रोत सुनिश्चितता गरी ठेक्का लगाइएका योजनाका लागि १२ करोड बजेट विनियोजन गरिएको नगरसभामा जानकारी गराइएको छ । नक्सा प्रणालीलाई व्यवस्थित गर्नका लागि बजेटको व्यवस्था गरिएको छ । 

कृषि क्षेत्रको आधुनिकीकरण तथा वैज्ञानिकीकरणका लागि कृषिमा यान्त्रिकीकरण कार्यक्रमलाई निरन्तरता, कृषकहरूको क्षमता अभिवृद्धि तथा प्रविधि हस्तान्तरणका तालिमहरु सञ्चालन, कृषकलाई अनुदानमा कृषियन्त्र उपकरण उपलब्ध गराउने, खाद्यान्न बीउ उत्पादन गर्ने, कृषकलाई उत्पादन परिमाणका आधारमा अनुदान दिनेलगायतका कृषिसम्बन्धी नीति कार्यान्वयन गर्नका लागि सात करोड विनियोजन गरिएको छ । 

बालबालिका ज्येष्ठ नागरिक तथा लक्षित महिला समूहका लागि विशेष स्वास्थ्य कार्यक्रम सञ्चालनका लागि चार करोड विनियोजन गरिएको छ । 

चालू आर्थिक वर्षमा भरतपुर महानगरपालिकाले ६ अर्ब २१ करोड १९ लाख ७४ हजार बजेट विनियोजन गरेको थियो । अनुमानित आयमा २०८० जेठ मसान्तसम्म महानगरले आन्तरिक आम्दानी ९७ करोड ५८ अर्थात् ६६ प्रतिशत आम्दानी गरेको सभालाई जानकारी गराइएको थियो । 

व्ययतर्फ चालू शीर्षकमा दुई अर्ब ६६ करोड १० लाख १९ हजार विनियोजन भएकामा २०८० जेठ मसान्तसम्म एक अर्ब ७५ करोड ५८ लाख ८८ हजार अर्थात् ६५ प्रतिशत र पुँजीगततर्फ तीन अर्ब ५५ करोड नौ लाख ५५ हजार विनियोजन भएकामा एक अर्ब २१ करोड ९१ लाख ६९ हजार अर्थात् ३५ प्रतिशत खर्च भएको छ । 

कूल खर्च दुई अर्ब ९८ करोड पाँच लाख अर्थात् ४८ प्रतिशत भएको अवस्था रहेको सभामा जानकारी दिइएको थियो । गौतम बुद्ध अन्तरराष्ट्रिय क्रिकेट रंगशालाको अधुरो कार्य पूरा गर्नका लागि संघीय सरकार, बागमती प्रदेश सरकारसँग साझेदारी र सहर्काय गर्न तीन करोड विनियोजन गरिएको छ ।

यसअघि प्रमुख रेनु दाहालले नीति तथा कार्यक्रम प्रस्तुत गरेकी थिइन् । यसैगरी, विनियोजन ऐन, न्यायिक समितिको प्रतिवेदन, लेखा समितिको प्रतिवेदन पेस गरिएको छ । कार्यपालिका सदस्यहरुले सोमबारसम्म अध्ययन गरेर मंगलबार पुनः छलफल गरी पारित गरिने महानगरपालिकाले जनाएको छ ।