अमेरिकाका पूर्व राष्ट्रपति डोनाल्ड ट्रम्पले गोप्य दस्तावेजलाई अनधिकृत व्यक्ति वा पक्षसँग छलफल गरेको श्रव्य सामग्री सार्वजनिक भएको छ ।

सिएनएनले सोमबार राति प्रसारण गरेको अडियो फाइल र एबिसी तथा सिबिएसले पनि प्राप्त गरेको अडियो फाइलमा ट्रम्पले पेन्टागनको गोप्य दस्तावेज इरानमाथि आक्रमण गर्ने योजना रहेको संकेत गरेको देखिन्छ ।

सन् २०२१ को जुलाईमा न्युजर्सीस्थित बेडमिनिस्टरस्थित गल्फ क्लबमा ट्रम्पले आफ्ना पूर्व चिफ अफ स्टाफ मार्क मिडोजको संस्मरणमा काम गरिरहेका व्यक्तिहरूका लागि दिएको अन्तर्वार्ताबाट यस विषयमा दुई मिनेटको रेकर्डिङ सार्वजनिक भएकोे हो ।

विशेष वकिल ज्याक स्मिथले पदबाट हटेपछि गोप्य दस्तावेजको दुरुपयोग गरेको आरोपमा ट्रम्पमाथि ४९ पृष्ठ लामो अभियोग पत्रमा उक्त रेकर्डिङको ट्रान्सक्रिप्टको केही अंशलाई प्रमाणका रूपमा उद्धृत गरिएको छ ।

‘यी कागजातहरू हुन्,’ ट्रम्पले रेकर्डिङमा भनेका छन् । यो उद्धरण भने अभियोग पत्रमा समावेश गरिएको थिएन ।

अडियोमा उनले कुनै कुरालाई ‘अति गोप्य’ अर्थात् ‘यो गोप्य जानकारी हो’ भनेर पनि संकेत गरेको र कोठामा अरूलाई केही देखाइरहेको बुझिन्छ ।

‘यो सेनाले गरेको थियो र मलाई दिइएको थियो,’ श्रव्य सामग्रीमा अमेरिकी पूर्व राष्ट्रपति ट्रम्पले भनेका छन् । यसमा उक्त दस्तावेज ‘वर्गीकृत गरिएको’ उल्लेख छ ।

‘तपाईं देख्नुहुन्छ, राष्ट्रपतिको रूपमा मैले यसलाई सार्वजनिक गर्न सक्थेँ । अब म सक्दिनँ, तपाईंलाई थाहा छ,’ उनले भने । ‘अब हामीलाई समस्या हुन्छ,’ ट्रम्पको भनाइलाई पछ्याउँदै उनका एक कर्मचारीको आवाज सुनिन्छ ।

‘के यो रोचक छैन ? यो धेरै राम्रो छ,’ ट्रम्प भन्छन् र रेकर्डिङ समाप्त हुन्छ अनि उनले कसैलाई केही कोकहरू ल्याउन आह्वान गर्छन् । 

यसै महिनाको सुरुमा ट्रम्पले अमेरिकी सरकारका गोप्य सूचना जानीजानी गलत तरिकाले व्यवस्थापन गरेको र उनीहरूलाई फर्कन नदिन षड्यन्त्र गरेको ३७ वटा अभियोगमा आफू निर्दोष रहेको स्वीकार गर्दै आपराधिक अभियोगको सामना गर्ने पहिलो अमेरिकी राष्ट्रपति बनेका थिए । 

न्याय विभागले अर्को वर्ष ह्वाइट हाउस मा पुनः विजय हासिल गर्ने होडमा रहेका ट्रम्पले जासुसी ऐन र अन्य कानुनको उल्लंघन गरेको आरोप लगाएको छ । 

विभागले भनेको छ, ‘उनले पद छोडेपछि गोप्य कागजात हटाउनुभयो र तिनीहरूलाई राष्ट्रिय अभिलेखालयमा हस्तान्तरण गर्न असफल हुनुभयो ।’

सन् २०२१ को जुलाईमा राष्ट्रपतिबाट हटिसकेका ट्रम्पले एक लेखक, एक प्रकाशक र उनका दुई कर्मचारीसँग गरेको अडियो रेकर्डिङसहितका ‘गोप्य’ र ‘अति गोप्य’ प्रमाणहरू भएको दस्तावेज सार्वजनिक गरेको अभियोग दर्ता गरिएको छ । 

अर्बपति विपक्षी नेता ७७ वर्षीय ट्रम्पमाथि फ्लोरिडास्थित आफ्नो समुन्द्री किनारको हवेलीमा गैरकानुनी रूपमा लगेका दर्जनौँ गोप्य कागजात जानीजानी जम्मा गरेको, फिर्ता गर्न इन्कार गरेको र अनुसन्धानकर्तालाई उनीहरूको पुनः प्राप्तिको लागि अवरोध गर्ने षड्यन्त्र गरेको आरोप लगाइएको छ ।

ट्रम्पमाथि सुरक्षा अनुमति नभएका व्यक्तिहरूसँग संवेदनशील अमेरिकी गोप्य कुराहरू साझा गरेको आरोप पनि लगाइएको छ ।

उनको फौजदारी मुद्दाको सुनुवाइ अगष्ट १४ देखि सुरु हुने तय भएको छ, तर उनको कानुनी टोलीले प्रारम्भिक मिति महिनौँ पछाडि धकेल्ने सम्भावना छ ।

अडियो प्रकरण निर्वाचन प्रभावित पार्ने खेल मात्र : ट्रम्प

पूर्वराष्ट्रपति ट्रम्पले गोप्य दस्तावेजलाई अनधिकृत व्यक्ति वा पक्षसँग छलफल गरेको श्रव्य सामग्री सार्वजनिक भएको भनी आएको चर्चामा कुनै सत्यता नरहेको बताएका छन् । 

ट्रम्पले सामाजिक सञ्जाल ‘ट्रुथ सोसल वेबसाइट’ मा अडियोलाई बनावटी ‘विक्षिप्त’ कथा भनी खण्डन गरेका हुन् । अभियोजनकर्ताले न्याय विभाग र एफबीआईसँग मिलेर ‘अवैध रूपमा’ अडियो बनाइ अफवाह फैलाउन खोजेको उनको आरोप छ । 

उक्त श्रव्य सामग्री  ‘वास्तवमा आफ्ना विपक्षीहरूले आफूमाथिका आलोचनालाई विषयान्तर गर्न रचेको प्रपञ्च’ बाहेक केही नभएको उनको दाबी छ । 

यो निरन्तरको ‘विच हन्ट’ व्यक्तिलाई गलाउने झुटा आरोप जस्तै अर्को बनावटी आरोप भएको र यसलाई उनले विपक्षीहरूले चुनावी हस्तक्षेपका लागी सिर्जना गरेको हतियार भएको बताएका छन् । 

‘विच हन्ट गर्ने उनीहरू ठग हुन्,’ पूर्व राष्ट्रपति ट्रम्पले लेखेका छन् । 

सिएनएनले सोमबार राति प्रसारण गरेको अडियो फाइल र एबिसी तथा सिबीएसले पनि प्राप्त गरेको अडियो फाइलमा ट्रम्पले पेन्टागनको गोप्य दस्तावेज इरानमाथि आक्रमण गर्ने योजना रहेको संकेत गरेको देखिन्छ ।