गायिका आनी छोइङ डोल्माले दमक बाल अस्पताललाई एक करोड ८० लाख रुपैयाँ आर्थिक सहयोग प्रदान गरेकी छन् । आनी छोइङ डोल्मा फाउण्डेसनको तर्फबाट सोमबार काठमाडौंमा आयोजित कार्यक्रममा काठमाडौं इन्स्टिच्युट अफ चाइल्ड हेल्थका प्रमुख प्रा.डा. भगवान् कोइरालालाई उक्त सहयोग प्रदान गरिएको हो ।
फाउण्डेसनका तर्फबाट गीतकार दुर्गालाल श्रेष्ठले उक्त रकमको चेक प्रा.डा. कोइरालालाई प्रदान गरे । कार्यक्रमलाई सम्बोधन गर्दै आनीले भनिन्, ‘मैले संगीतबाट जुन उपलब्धि हासिल गरेँ, त्यो हजुरहरुकै कारणले हो । म यो उपलब्धिलाई तपाईंहरुसामु बाँड्न चाहन्छु ।’ सत्कर्म गर्न सके धर्म मिल्छ भन्ने आफूलाई लाग्ने उनले बताइन् ।
कार्यक्रममा डा. कोइरालाले नेपालमा एक हजार बालबालिका जन्मिँदा उपचार नपाएर ३३ जनाको मृत्यु हुने तथ्यांक प्रस्तुत गरे ।
बालबालिकालाई उपचारको अभावबाट हुने क्षति र अपांगताबाट बचाउन झापाको दमकमा बाल अस्पताल सञ्चालनमा आइसकेको छ । चार महिनामै यसले ठूलो संख्यामा बहिरंग र अन्तरंग सेवा प्रदान गरेको कोइरालाले जानकारी दिए ।
काठमाडौंको बुढानीलकण्ठमा पनि बहुविशिष्टकृत बाल अस्तालको निर्माण सुरु भएको पनि उनले जानकारी दिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
