एसिसी यू–१९ प्रिमियर कपमा इरानविरुद्ध नेपाली टिमका कप्तान देव खनालले आक्रामक शतक बनाएका छन् । उनले ५९ बलमा १२ चौका र ४ छक्काको मद्दतमा शतक बनाएका हुन् । देव शतक बनाएलगत्तै छक्का हान्ने धुनमा आउट भए । 

देवले ३३ बलमा ६ चौका र २ छक्काको मद्दतमा अर्धशतक पूरा गरेका थिए । ओपनिङ ब्याटर दीपक बोहराले अर्धशतकीय पारी खेलिसकेका छन् । उनी अहिले ५५ बलमा पाँच चौका र दुई छक्काको सहयोगमा ६५ रनमा अविजित छन् ।  

मलेसियाको बांगीमा टस हारेर ब्याटिङको निम्तो पाएको नेपालले ५ ओभरमा २० रन नबनाउँदै दुई विकेट गुमाएको थियो । त्यहाँबाट देव र दीपक बोहराले नेपाललाई उत्कृष्ट कमब्याक दिलाए । उनीहरूबीच १५० रनको साझेदारी बन्यो ।  

यो समाचार तयार पार्दासम्म नेपालले २२ ओभरमा ३ विकेट गुमाएर १ सय ८८ रन बनाएको छ । नेपालले दोस्रो विकेटको रूपमा आकाश त्रिपाठीलाई गुमायो । ९ बलको सामना गरेका उनले ३ रन मात्र जोड्न सके । 

यस्तै, नेपालले पहिलो ओभरको दोस्रो बलमै ओपनर अर्जुन कुमाललाई शून्यमै गुमाउन पुग्यो ।  समूह चरणका तीनै खेल जितेर नकआउट चरणमा पुग्ने र उपाधि उचाल्ने नेपालको लक्ष्य छ ।  

प्रिमियर र एसिया कप नेपाली टिमका लागि विश्वकपको राम्रो तयारी हुनेछ । सिनियर टिमले पनि प्रिमियर कप जितेर एसिया कप खेलेका कारण यू–१९ टिममा पनि आत्मविश्वास बढेको छ । प्रिमियर कपमा नेपालले सेमिफाइनल र फाइनलमा यूएई, हङकङ, मलेसिया र कुवेतलाई प्रतिद्वन्द्वी पाउने सम्भावना छ  ।

त्यसअघि समूह ‘ए’ मा रहेको नेपालले ग्रुप स्टेजमा इरानका साथै बहराइन र साउदी अरेबियासँग खेल्ने तालिका छ । चार समूहका शीर्ष टोलीले सेमिफाइनलको यात्रा गर्नेछन् ।   

फाइनलमा पुग्ने दुई टोली र तेस्रो स्थानमा रहने गरी तीन टिम एसिया कप खेल्नेछन् । भारत, पाकिस्तान, बंगलादेश, अफगानिस्तान र श्रीलंका भने यू–१९ एसिया कपमा सोझै छनोट भइसकेका छन् । यू–१९ विश्वकप अघि एसिया कप हुन लागेको हो ।   

विश्वकप २०२४ को जनवरीमा श्रीलंकामा हुनेछ । विश्वकपमा नेपालले समूह चरणमा पाकिस्तान, न्युजिल्यान्ड र अफगानिस्तानको सामना गर्नेछ ।