फ्रान्सका राष्ट्रपति इमानुएल म्याक्रोनले  इजरायल भ्रमण गर्ने तयारी गरेको जेरुसेलम पोस्टले उल्लेख गरेको छ। इजरायलमा हमास समूहले गरेको घातक हमलापछि हुन लागेको उनको भ्रमणलाई विशेष चासोका साथ हेरिएको छ ।  

हमास समूहद्वारा अक्टोबर ७ देखि इजरायलमा गरिएका शृंखलाबद्ध हमलामा परी १,४०० इजरायलीको हत्या  भएको छ ।  करिब २०० जनालाई अपहरण गरिएको छ । 

हमासले अपहरण गरेका मध्ये एकजना फ्रान्सेली इजरायली नागरिक माया स्किम सोमबार टेलिग्राममा पोस्ट गरिएको भिडियोमा देखा परेका थिए ।  सो भिडियो सार्वजनिक भएपछि  म्याक्रोनले उनको तत्काल  निःशर्त रिहाइको माग गरेको द जेरुसेलम पोस्टले उल्लेख गरेको छ। 

म्याक्रोन इजरायलका दृढ समर्थक हुन् ।
यसअघि अक्टोबर ८ मा म्याक्रोनले इजरायली समकक्षी आइज्याक हर्जोग र इजरायलका प्रधानमन्त्री बेन्जामिन नेतान्याहुसँग वार्ता गरेका थिए ।  इजरायलमा गरिएको आक्रमणको निन्दा गर्दै फ्रान्सले पीडित देशलाई समर्थन गर्ने प्रतिबद्धता जनाएको थियो ।

हमासको आक्रमणपछि शनिबार बिहान दक्षिणी र मध्य इजरायलमा रकेटको ब्यारेज प्रहार भएपछि म्याक्रोनले नेतान्याहु र हर्जोगसँग वार्ता गरेका थिए । 

सामाजिक सञ्जाल एक्समा म्याक्रोनले उल्लेख गरेका छन्–मैले राष्ट्रपति हर्जोग र प्रधानमन्त्री नेतन्याहुसँग कुरा गरेको छु। म गाजाबाट इजरायल, त्यहाँका सैनिक र त्यहाँका जनतामाथि गरिएको आक्रमणको निन्दा गरेको छु। फ्रान्स, इजरायल र इजरायलीहरूसँग ऐक्यबद्धतामा उभिएको छ र तिनीहरूको सुरक्षाका निम्ति दृण छ ।

यसै बीच हमासले इजरायलमा आक्रमण गरेपछि बेपत्ता भएका थुप्रै फ्रान्सेली नागरिकका परिवारका सदस्यहरूसँग सोमबार फ्रान्सका पूर्वप्रधानमन्त्री म्यानुअल भाल्सले भेट गरेका छन् ।

उनले तेल अवीवमा बेपत्ता भएकाहरूको परिवारलाई सान्त्वना दिएका छन् ।  इजरायलको राष्ट्रिय एकता पार्टीका नेता बेनी गान्ट्जले जर्मन चान्सलर ओलाफ स्कोल्जसँग भेट गर्न लागेको  जेरुसेलम पोस्टले जनाएको छ ।

गाजास्थित स्वास्थ्य मन्त्रालयका अनुसार गाजामा इजरायली हवाई आक्रमणमा मारिएका प्यालेस्टाइनीको संख्या २ हजार ७५० पुगेको छ भने घाइतेको संख्या ९ हजार ७ सय पुगेको छ । मन्त्रालयले इजरायली आक्रमणमा मारिएका व्यक्तिहरूमा ७५० भन्दा बढी बालबालिका रहेको बताएको  छ।

हमासको आक्रमणबाट इजरायलमा मर्नेको सङ्ख्या अहिले १,४०० भन्दा बढी भएको इजरायल डिफेन्स फोर्स (आइडिएफ)ले जनाएको छ।