नेपाल सशस्त्र प्रहरी बलले मधेसका जिल्लाहरूसँग जोडिएको भारतीय सीमानाकामा रहेका सीमा स्तम्भहरूको पुनर्निर्माण, मर्मत सम्भार तथा रंगरोगनको काम सुरु गरेको छ । चार हजारभन्दा बढी सीमा स्तम्भहरूको पुनःनिर्माण, मर्मत सम्भार र रंगरोगनको काम सुरु गरिएको हो ।
धनुषाको सीमावर्ती पालिका नगरपालिका नगराइन नगरपालिकाको वडा नम्बर–२ जटही नाकामा सीमा स्तम्भको मर्मत गरेर सीमा स्तम्भ मर्मत तथा रंगरोन कार्यको शुभारम्भ गरिएको हो । मधेस प्रदेशका आठ वटै जिल्लाको भारतीय सीमानाकामा रहेको चार हजारभन्दा बढी सीमास्तम्भहरुको पुनःनिर्माण थालिएको सशस्त्र प्रहरी बल नेपाल नम्बर २ छिन्नमस्ता वाहिनीका वाहिनी पति दीपेन्द्र शाहले जानकारी दिए । उनले पहिलो चरणमा एक हजार सीमा स्तम्भको मर्मत तथा रंगरोगन गरिने बताए ।
२०७७ साल श्रावण १९ गतेको बसेको मन्त्रिपरिषद् बैठकबाट नेपालले सीमामा रहेका बेजोर नम्बर भएको सीमा स्तम्भको पुनःनिर्माण, मर्मत सम्भार तथा रंगरोगनको काम नेपाल पक्षले गर्ने निर्णय गरेको थियो । त्यस्तै भारतीय पक्षले जोर नम्बर भएको सीमा स्तम्भको मर्मत तथा रंगरोगन गर्ने वाहिनी पति शाहले बताए ।
सीमा सुरक्षाका लागि सीमा स्तम्भको मर्मतसम्भारले सीमा स्तम्भको मात्र नभई दुई देशकै सुरक्षा, सद्भाव र प्राविधिक जटिलतालाई समाधान गर्ने भारतको एसएसबी ४८ औं बटालियन जयनगरका डेपुटी कमाण्डेण्ट सन्तोष निमोरियाले बताए ।
सीमावर्ती पालिकाका प्रमुखहरूले काम ठीक तरिकाबाट भइरहेको बताएका छन् । सीमा सम्बन्धमा कुनैपनि निर्णय गर्दा काठमाडौं र दिल्लीका प्रतिनिधि दुवै देशको राजधानीमै बसेर कुनै ठोस निर्णय गर्न नहुने सुझाव दिएका छन् । उनीहरूले सुरक्षाकर्मीको काम ठिकै भए पनि नीतिगत कुराहरूमा सीमावर्ती जनताको सुझावको स्वामित्व समेत हुनुपर्ने बताएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।