नेपाली कांग्रेस छाडेर राष्ट्रिय स्वतन्त्र पार्टीमा प्रवेश गरेका डा. स्वर्णिम वाग्ले रास्वपाकाे उपसभापति बन्ने भएका छन् । रास्वपा सभापति रवि लामिछानेले महोत्तरीको जलेश्वरमा जारी बैठकमा मंगलबार वाग्लेलाई उपसभापति बनाउने प्रस्ताव राखेका छन् ।
रास्वपाको विधानमा दुईजना उपसभापति रहने व्यवस्था छ । हाल डोलप्रसाद अर्याल मात्र उपसभापति छन् । अर्को उपसभापतिमा अर्थविद् समेत रहेका वाग्लेलाई ल्याउन लागिएकाे हाे ।
वाग्लेलाई औपचारिक रूपमा बुधबार उपसभापति घोषणा गरिने भएकाे छ । उनकाे वरियता भने अर्का उपसभापति अर्यालपछिकाे रहनेछ । यद्यपि वरियता निर्धारण वर्णानुक्रमअनुसार राखिने बताइएकाे छ ।
सभापति अनुपस्थित रहेको बैठक दुई उपसभापति मध्ये जेष्ठ वा सभापतिले तोकेकाले सभापतिको भूमिका निर्वाह गर्ने विधानको व्यवस्था छ ।
जारी बैठकले केही दिनअघि रास्वपा प्रवेश गरेका डा. नन्दन यादवलाई केन्द्रीय सदस्य बनाउने भएकाे छ ।
वाग्ले वैशाखको उपचुनावमा तनहुँ–१ बाट निर्वाचनमा लड्नका लागि कांग्रेसले टिकट नदिएपछि रास्वपामा प्रवेश गरेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
