नेपाली कांग्रेसका नेता शेखर कोइरालाले राष्ट्रिय सभा सदस्य निर्वाचनको टिकट न्यायोचित रूपमा वितरण गर्न नसकिएको स्वीकार गरेका छन् ।सोमबार उम्मेदवारहरुको मनोनयन दर्तापछि सामाजिक सञ्जालमार्फत उनले यस्तो बताएका हुन् ।
कोइरालाले भनेका छन्, ‘राष्ट्रिय सभा सदस्यको उम्मेदवार चयन प्रक्रिया सहज थिएन । कांग्रेस जस्तो लामो इतिहास भएको संघर्षशील पार्टीमा धेरै निष्ठावान, निःस्वार्थ, योग्य र सक्षम आकांक्षी साथीहरुको सूची लामो थियो, यसर्थ सीमित सिटका कारण पार्टीका साथीहरुलाई न्याय गर्न चाहेर पनि सम्भव भएन । तर, पनि पार्टीमा अवसरको समान वितरण र सबै पक्षको हित स्थापित होस् भन्नेमा हामी निकै चनाखो थियौँ ।’
पार्टीको वर्तमान ढाँचा, सोच र निर्णय प्रक्रियालाई प्रभावित गर्ने शक्तिहरुका कारण सबैलाई न्याय गर्न नसकेको उनले बताएका छन् ।
उनले भनेका छन्, ‘पार्टीको वर्तमान ढाँचा, सोच र निर्णय प्रकियालाई प्रभावति गर्ने शक्ति के–कस्ता छन् भनेर साथीहरुले मनन गर्नुभएको र गर्नुहुनेछ भन्ने विश्वास लिएको छु । न्यायोचित टिकट वितरण गर्न असमर्थ पार्टी निणर्यमा मैले गल्ती–कमजोरी गरेको रहेछु भने म त्यसलाई स्वीकार्दै साथीहरुको सल्लाह र सुझाबबाट भविष्यमा अगाडि बढ्ने प्रण गर्दछु, मेरो अभियान पार्टीमा अवसरको न्यायोचित वितरण होस् भन्ने नै हो ।’
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
