नेकपा एमालेको गण्डकी प्रदेश संसदीय दलले प्रदेश सभा सचिवालयमा एकसाथ तीन वटा सङ्कल्प प्रस्ताव दर्ता गरेको छ । बुधबार गण्डकी प्रदेश सभा सचिवालयमा एमाले संसदीय दलले सङ्कल्प प्रस्ताव दर्ता गराएको हो । 

जसअनुसार लुम्बिनीमा रहेको सुस्ता गाउँपालिकालाई गण्डकी प्रदेशमा सार्न सङ्कल्प प्रस्ताव दर्ता गरेको छ भने पोखरा अन्तर्राष्ट्रिय विमानस्थलमा नियमित अन्तर्राष्ट्रिय उडान गर्न र काली गण्डकी तिनहुँ डाइभर्सन बहुउद्देश्यीय परियोजना गण्डकी प्रदेशसँग समन्वय नगरीकन अघि बढाउन खोजिएको भन्दै सो विषय खारेजीको माग गरी सङ्कल्प प्रस्ताव दर्ता गरेको हो ।

संविधानअनुसार सुस्ता गण्डकी प्रदेशको भूगोल भए पनि अहिले लुम्बिनीमा परेको छ । गण्डकीको प्रदेश विकास समस्या समाधान समितिको बैठकले पनि यसबारे निर्णय गरेर संघमा पठाएको थियो । तर अहिलेसम्म कुनै जवाफ आएको छैन । अहिले सङ्कल्प प्रस्ताव नै दर्ता गरेर आफ्नो भूमि फिर्ता ल्याउनुपर्ने माग एमालेले राखेको छ । 

साथै एमालेले पोखरा अन्तर्राष्ट्रिय विमानस्थल २०२३ को नयाँ वर्षबाट सञ्चालनमा आए पनि नियमित अन्तर्राष्ट्रिय उडान हुन नसकेको भन्दै विमानस्थल सञ्चालन गर्न आवश्यक एयर सर्भिस एग्रिमेण्ट लगायतका अन्य आवश्यक पूर्वाधार निर्माण गरी नेपाल एयरलाइन्सको जहाजमार्फत यथाशीघ्र नियमित अन्तर्राष्ट्रिय व्यावसायिक उडान सुचारु गर्न आग्रह गरेको छ । 

त्यस्तै अन्य अन्तर्राष्ट्रिय विमान कम्पनीलाई समेत नियमित अन्तर्राष्ट्रिय उडान गर्न आकर्षित गर्ने नीति, योजना तथा कार्यक्रम तत्काल सञ्चालन गर्न प्रदेश सरकारमार्फत नेपाल सरकारको ध्यानाकर्षण गराएको बताएको छ । सरकारले अध्ययन गरी सञ्चालन गर्न लागेको काली गण्डकी तिनहुँ डाइभर्सन बहुउद्देश्यीय परियोजना संविधानअनुसार प्रदेश र स्थानीय तहसँग समन्वय नगरी संघीय सरकारले एकतर्फी रूपमा सुरु गर्न लागेको भन्दै परियोजना तत्काल खारेज गर्न माग गरेको छ ।

सङ्कल्प प्रस्ताव दर्तापछि सञ्चारकर्मीहरूसँग कुरा गर्दै नेकपा एमालेका सांसद गोविन्द नेपालीले एमालेले तीन वटा सङ्कल्प प्रस्ताव प्रदेश सभा सचिवालयमा दर्ता गरेको बताए । उनले सङ्कल्प प्रस्तावमा सुस्ता गाउँपालिका गण्डकी प्रदेशमा रहनुपर्ने, काली गण्डकी तिनहुँ डाइभर्सन बहुउद्देश्यीय परियोजना गण्डकी प्रदेशसँग समन्वय नगरीकन अघि बढाउन खोजिएकाले खारेजी गर्न माग गरिएको बताए । उनले पोखरा अन्तर्राष्ट्रिय विमानस्थल सुचारु गर्नका लागि प्रदेश सरकारले गर्नुपर्ने नीतिगत र विविध पहलकदमीहरूका बारेमा प्रदेश सभा सचिवालयमा दर्ता गराएको बताए ।

सङ्कल्प प्रस्ताव ग्रहणपछि बोल्दै गण्डकी प्रदेश सचिवालयका सचिव हरिराज पोखरेलले सङ्कल्प प्रस्ताव प्रदेश सभा सदस्यहरूले एक हप्ताअघि, मन्त्रीहरूले तीन दिनअघि सचिवलाई दिनुपर्ने प्रावधान रहेको बताए ।

तीन वटै सङ्कल्प प्रस्तावहरू सचिवले कार्य व्यवस्थाका नाममा दर्ता गर्ने तोक लगाइसकेपछि प्रक्रिया अघि बढ्ने सचिव पोखरेलले बताए । सङ्कल्प प्रस्तावको स्वीकार गर्ने वा नगर्ने भन्नेबारेमा निर्णय सभामुखको हुने र संसद्को कामकारबाहीबाट सङ्कल्प प्रस्ताव अघि बढ्ने बताए ।