पूर्वप्रधानमन्त्री एवं नेपाल समाजवादी पार्टीका अध्यक्ष डा. बाबुराम भट्टराईले प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहालप्रति लक्षित गर्दै व्यवस्था जोगाउने जिम्मेवारी लिएकाहरूबाटै अहिलेको व्यवस्थामाथि संकट रहेको बताएका छन् । 

बुधवार पार्टी केन्द्रीय कार्यालय तीनकुनेमा ११४ औँ अन्तर्राष्ट्रिय श्रमिक महिला दिवसको अवसरमा आयोजित कार्यक्रमलाई सम्बोधन गर्दै उनले यस्तो बताएका हुन् । उनले विगतमा देशमा संघीय लोकतान्त्रिक गणतन्त्रात्मक व्यवस्था ल्याउन क्रान्ति गर्नेहरूबाटै अहिले गणतन्त्रात्मक शासनलाई सक्ने काम भइरहेको बताए । संघीय लोकतान्त्रिक गणतन्त्रलाई भर्खर जन्मिएको बालकको रूपमा चित्रण गर्दै उहाँले प्रधानमन्त्री दाहालले संघीयतालाई सक्ने काम गरिरहेको आरोप लगाए । 

उनले अहिले सरकार बच्चाको खेल जस्तो गरेर बनाउने, गिराउने काम भइरहेको पनि बताए । उनले कांग्रेस, कम्युनिष्ट, माओवादीहरू सबैको एउटै धर्म भनेको भ्रष्टाचार गर्नु रहेको बताए । उनले देशमा प्रत्यक्ष निर्वाचित राष्ट्रपति र पूर्ण समानुपातिक सांसद नभएसम्म अस्थिरता कायम भइरहेको जिकिर गरे । उनले आफ्नो पार्टी अरू पार्टी भन्दा उन्नत पार्टी भएकाले अरू पार्टीको पुच्छर नबन्ने दाबी गरे । उनले क्रान्तिको नेतृत्व गरेकाहरू नै सरकारमा रहँदा पनि विकास हुन नसकेको भन्दै उनीहरूको निकम्मापन,भ्रष्टिकरण, परिवारवाद र नांगो प्रकारको राज्यको दोहनले गर्दा जनतामा वितृष्णा उत्पन्न भएको बताए । 

उनले भने, ‘हिजोकै हाम्रो क्रान्तिकारी साथीको निकम्मापनले गर्दा, भ्रष्टीकरण, परिवारवाद र नांगो प्रकारको राज्यको दोहनले गर्दा जनतामा जुन वितृष्णा पैदा भएको छ, यो व्यवस्था नै उल्टिने हो की भन्ने आशंका जुन छ, यो दोष यिनीहरूले नै लिनुपर्छ । कांग्रेस, कम्युनिष्ट, माओवादी जे भन्नुस्, साझा गोत्र र धर्म एउटै भ्रष्टाचार नै छ । अहिले देशमा जे भइरहेको छ ठिक भइरहेको छैन ।’  

अध्यक्ष भट्टराईले अहिले अस्थिरता सिर्जना गरेर व्यवस्थालाई नै धराशायी बनाउने काम भइरहेको आरोप लगाए ।