नेपाल मजदुर किसान पार्टीका सांसद प्रेम सुवालले सिद्धान्त र विचार नमिल्ने राजनीतिक दलहरूको निर्वाचन गठबन्धन र सत्ता गठबन्धनको परिणाम सुखद नहुने बताएका छन् ।
आज प्रतिनिधि सभाको बैठकमा उनले नेपालको राजनीतिक अवस्था सुखद नभएको भन्दै विश्वासघात गर्नेलाई राजनीतिक दल भन्न नमिल्ने बताएका छन् ।
उनले भने, ‘तिहुन चखुवा राजनीतिक दलहरूमा एकले अर्कोलाई विश्वासघात र बेइमानी गर्नु, स्वाभाविक मानिन्छ । राजनीतिक दल निश्चित दर्शन अनुसार, जनताको इमानदार भएर सेवा गर्ने क्षेत्र हो । तर विश्वासघात गर्नेलाई राजनीतिक दल भन्न सकिँदैन । सिद्धान्त र विचार नमिल्ने राजनीतिक दलहरूको निर्वाचन गठबन्धन र सत्ता गठबन्धनको परिणाम सुखद हुँदैन । नेपालमा अहिलेको अवस्था पनि यही नै छ । सिद्धान्तहीन गठबन्धन गर्नेहरू अवस्था एक दिन उठ्नै नसक्ने गरी पछारिने छन् ।’
यस्तै, उनले सिद्धान्तहीन गठबन्धन गर्नेहरू घुसलाई प्रसाद र भ्रष्टाचारलाई पूजा ठान्ने भन्दै सरकारको नेतृत्व पुँजीवादीले होइन, कामदार वर्गको प्रतिनिधित्वले गर्नुपर्ने बताए ।
उनले भने, ‘सिद्धान्तहीन गठबन्धन गर्नेहरू घुसलाई प्रसाद र भ्रष्टाचारलाई पूजा ठान्छन् । काममा भ्रष्टाचार गर्छन् । बाहिरबाट घर गएर लुगा फेर्नु उथलपुथल होइन, सरकारको नेतृत्व कामदार वर्गको प्रतिनिधित्वले गर्नुपर्छ, पुँजीवादी सरकारको नेतृत्व गरेर क्रान्तिकारीहरू केन्द्रित हुने दाबी गर्नु कम्युनिस्ट आन्दोलनलाई भड्खालोमा पार्नु हो ।’
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
