हङकङमा जारी त्रिकोणात्मक टी–२० आई सिरिजअन्तर्गत पपुवा न्यूगिनी (पिएनजी) विरुद्ध नेपाललाई दोस्रो सफलता मिलेको छ । नेपाललाई दोस्रो सफलता रनआउटको रूपमा प्राप्त भयो ।  

पिएनजीको दोस्रो विकेट लिनेक्रममा गुलशन झाले सेसे बाउलाई २१ रनमा रनआउट गरे । योसँगै पिएनजीका दुवै ओपनर आउट भएका छन् । नेपाललाई पहिलो सफलता युवा बायाँ हाते तीव्र गतिका बलर प्रतिश जिसीले दिलाए । उनले तेस्रो ओभरको अन्तिम बलमा टोनी उरालाई १३ रनमा बोल्ड गरे ।  

त्यसअघि मोंग कोकस्थित मिशन रोड ग्राउन्डमा टस हारेर ब्याटिङ निम्तो पाएको नेपालले निर्धारित २० ओभरमा ६ विकेट गुमाएर १ सय ९८ रन बनायो । नेपालका लागि कुशल भुर्तेल र सन्दीप जोराले अर्धशतकीय पारी खेले ।

कुशलले ३९ बलमा चार छक्का र चार चौकासहित ५९ रनको इनिङ खेले । टी–२० आईमा उनको यो आठौँ अर्धशतक हो । योसँगै कुशलले यस ढाँचामा १ हजार रन पूरा गरेका छन् । 

उनी टी–२० आईमा १ हजार रन पूरा गर्ने दोस्रो नेपाली ब्याटर हुन् । यसअघि यो उपलब्धि दीपेन्द्र सिंह ऐरीले हासिल गरिसकेका छन् । यस्तै, मध्यक्रमका ब्याटर सन्दीप जोराले २६ बलमा चार छक्का र तीन चौकासहित ५६ रनको पारी खेले ।

टी–२० आई करियरमा जोराको यो करियरकै उच्च स्कोर हो । यस्तै, यस ढाँचामा उनको यो दोस्रो अर्धशतक हो । त्यस्तै, विवेककुमार यादवले चार बलमा तीन छक्कासहित अविजित १९ रनको आक्रामक पारी खेले ।  

विनोद भण्डारीले २७, गुलशन झाले अविजित १५ र लोकेश बमले १४ रन जोडे । पिएनजीका लागि  कप्तान असद भालाले ३ ओभरमा १८ रन दिएर सर्वाधिक दुई विकेट लिए । पिएनजीविरुद्ध नेपालले  प्लेइङ–११ मा एक खेलाडी परिवर्तन गरेको छ । 

नेपालले आज अविनाश बोहराको स्थानमा आकाश चन्दलाई मौका दिएको हो । सिरिजमा नेपाल पहिलो जितको खोजीमा छ । पहिलो खेल वर्षाले प्रभावित भएपछि हङकङसँग नेपालले अंक बाँडेको थियो ।