हङकङमा जारी टी–२० त्रिकोणात्मक सिरिजको फाइनलमा पपुवा न्यूगिनी (पिएनजी) विरुद्ध नेपाललाई दोस्रो सफलता मिलेको छ । नेपाललाई दोस्रो सफलता युवा तीव्र गतिका बलर आकाश चन्दले दिलाए ।
उनले १.४ ओभरमा कप्तान असद भालालाई २ रनमा आउट गरे । भालालाई आउट गर्नेक्रममा विकेटकिपर विनोद भण्डारीले उत्कृष्ट क्याच पक्रिए ।
नेपाललाई उत्कृष्ट सुरुवात दिलाउनेक्रममा करण केसीले पहिलो ओभरको दोस्रो बलमै सेसे बाउलाई शून्यमै पवेलियन फर्काए । नेपालले आज टस जितेर पहिला बलिङ गरिरहेको हो ।
नेपाल लिग चरणमा पिएनजीलाई ८५ रनले हराउँदै शीर्ष स्थान रहेर फाइनल खेल्न लागेको हो । पिएनजीले हङकङलाई १० विकेटले हराएर नेपालसँगको फाइनल भेट पक्का गरेको हो । नेपाल पिएनजीविरुद्धको अपराजित यात्रा कायमै राख्ने सोचमा छ ।
हालसम्म यी दुई टिमले पाँच टी–२० आई खेलमा एकअर्काको सामना गरेका छन्, जसमा नेपालले चार र पिएनजीले एक खेल जितेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
