भारतमा जारी इण्डियन प्रिमियर लिग (आइपिएल) मा कोलकाता नाइट राइडर्स (केकेआर) ले बुधबार राति सम्पन्न खेलमा दल्ली क्यापिटल्स (डिसी) लाई १०६ रनले हराएको छ ।

जारी सिजनमा केकेआरको यो लगातार तेस्रो जित हो । डिसीको भने यो तेस्रो हार हो । आफ्नो चौथो खेलमा कोलकाताले दिएको २ सय ७३ रनको लक्ष्य पछ्याएको दिल्ली १७.२ ओभरमा १ सय ६६ रनमै अलआउट भयो ।

उसका लागि कप्तान  ऋषभ पन्त र ट्रिस्टन स्टब्सले अर्धशतकीय पारी खेले पनि फराकिलो हार टार्न सकेनन् । कोलकाताविरुद्ध पन्तले २५ बलमा पाँच छक्का र चार चौकासहित ५५ तथा स्टब्सले ३२ बलमा ५ चौका र ५ छक्काको मद्दतमा ५४ रन बनाए ।

यस्तै, डेविड वार्नर १८ र पृथ्वी सा १० रनमा आउट भए । मिचेल मार्स, अभिषेक पोरेल र अक्षर पटेलले खाता नै खोल्न सकेनन् । दिल्लीलाई समेट्न वैभव अरोरा र बरुण चक्रवर्तीले तीन/तीन तथा मिचेल स्टार्कले दुई विकेट लिए ।

त्यसअघि विशाखापट्टनममा टस जितेर ब्याटिङ रोजेको कोलकाताले निर्धारित ओभरमा ७ विकेट गुमाएर २ सय ७२ रन बनायो । आइपिएल इतिहासमा बनेको यो दोस्रो उच्च स्कोर हो ।  

कोलकाताका लागि सुनिल नारायण र अङ्कृष्ण रघुवंशीले अर्धशतकीय पारी खेले । पहिलो विकेटका लागि फिल साल्ट र सुनिल नारायणले ४.३ ओभरमा ६० रनको साझेदारी गरे । साल्टले १२ बलमा १८ रन बनाए । त्यसपछि नारायण र रघुवंशीले ४८ बलमा १०४ रनको साझेदारी गरे ।

दोस्रो विकेटको रूपमा नारायण ३९ बलमा ८५ रनको विस्फोटक पारी खेल्दै आउट भए । त्यसक्रममा उनले समान सात चौका र छक्का प्रहार गरे । यस्तै,  रघुवंशीले २७ बलमा पाँच चौका र तीन छक्काको मद्दतमा ५४ रन बनाए ।

त्यस्तै, आन्द्रे रसेलले ४१, रिंकु सिंहले २६ र कप्तान श्रेयस अय्यरले १८ रनको योगदान दिए । दिल्लीका एनरिक नोर्टजेले तीन र इशान्त शर्माले दुई विकेट लिए ।  

यो जितपछि कोलकाता अंक तालिकाको शीर्ष स्थानमा उक्लिएको छ । अपराजित कोलकाताले तीन खेलबाट ६ अंक जोडेको छ । दिल्ली तालिकाको नवौँ स्थानमा छ । उसको चार खेलबाट दुई अंक मात्र छ ।  आइपिएलमा आज राति गुजरात टाइटन्स र पञ्जाव किंग्स प्रतिस्पर्धा गर्दै छन् ।