काठमाडौं– नेपाल पत्रकार महासंघको आयोजनामा शुक्रबार राजधानीमा विरोध प्रदर्शन भएको छ । महासंघले पेसागत सुरक्षाको ग्यारेण्टीको माग गर्दै विरोध प्रदर्शनीको आयोजना गरेको हो ।
लक डाउनको अवधिमा श्रमजीवी पत्रकारहरुलाई जागिरबाट निकाल्ने, बिना तलब विदामा राख्ने, पारिश्रमिक कटौती गर्ने समस्या देखिएको भन्दै राजधानीको बबरमहलमा प्रदर्शन गरिएको हो । प्रदर्शनमा श्रमजीवी पत्रकार ऐन लागू गर्नुपर्ने, पेसागत सुरक्षाको ग्यारेण्टी गर्नुपर्नेलगायत माग राखिएको थियो ।
विभिन्न सञ्चारगृहमा पत्रकारलाई कार्यालयमा काम गर्ने वातावरण नदिने, जिम्मेवारीविहीन बनाउनेजस्ता समस्या देखिएकाले प्रदर्शन गरेको महासंघले जनाएको छ । पत्रकारको पेसागत सुरक्षाको ग्यारेण्टी नहुँदासम्म आन्दोलन जारी रहने महासंघका अध्यक्ष गोविन्द आचार्यको भनाइ छ ।
कुनै पनि ढंगले मिडिया मालिकसँग सम्झौता नगर्ने प्रतिबद्धता जाहेर गर्दै उनले अबको आन्दोलन श्रमजीवी पत्रकार ऐन लागू नभएका मिडियाहाउसमा केन्द्रित हुने उनले बताए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।