प्रदेश २ का प्रदेश प्रमुखको शपथग्रहणमा उपराष्ट्रपति नन्दकिशोर पुन र सभामुख अग्निप्रसाद सापकोटा अनुपस्थित भएपछि उनीहरुको भूमिकामाथि प्रश्न उठेको छ । 

यसै विषयमा प्रधानमन्त्री केपी शर्मा ओलीका प्रेस सल्लाहकार सूर्य थापाले उपराष्ट्रपति पुन र सभामुख सापकोटाको भूमिकामाथि सामाजिक सञ्जालमार्फत प्रश्नहरु उठाएका छन् । 

थापाले अस्पताल भर्ना भएको वा उपस्थित हुन नसक्ने गरी गम्भीर स्वास्थ्य समस्यामा रहेको अवस्थामा पूर्व जानकारी गराएर बाहेक उपराष्ट्रपति र सभामुखको पदीय जिम्मेवारी एवं कर्तव्य स्वेच्छिक नहुने भएकाले उनीहरुको अनुपस्थिति गैरजिम्मेवार कदम भएकाे बताएका छन् । 
 
थापा लेख्छन्, 'उपराष्ट्रपति नै राष्ट्रपति भवनमा आयोजित शपथग्रहण समारोहमा उपस्थित नहुनु र राष्ट्रपतिले संविधानबमोजिम लिनुभएको निर्णयमा व्यक्तिगत कुण्ठा र बकवास गर्दै (पत्रकार महासंघको महाधिवेशन उद्घाटनका अवसरको प्रचण्डपथीय मन्तव्य) हिँड्नु झन् गैरजिम्मेवारी हो ।'

सार्वजनिक रुपमा विवादित हुनेगरी नबोल्ने सम्मानित पदमा बसेर गैरजिम्मेवार बन्न त किमार्थ पनि नमिल्ने थापाको भनाइ छ । यसअघि सरकारका विभिन्न तहमा नेतृत्व गरेको पूर्वहरुकै रवैयामा उपराष्ट्रपति र सभामुख हिँडेको थापाको आरोप छ । 

थापाले सोधेका छन्, 'गरिमामय पदमा आसिन हुने तर उक्त पदलाई  विपक्षी बनाएर दायर रिटमा पक्षमा बहस गर्न वकिल पठाउने, बोलाइएको बैठकमा उपस्थित नहुने, निर्णय गर्न अवरोध र अर्घेल्याइँ गर्ने, निर्णयविरुद्ध न्यायालयमा स्वयं रिट लिएर जाने, सपथग्रहण समारोह बहिस्कार गर्ने, अनि पदीय मर्यादा र गरिमाको खिल्ली उडाएर नै राज्यका प्रमुख पदाधिकारीको स्थानमा बसिरहने र टाँस्सिइरहने ?' 

थापाको थप प्रश्न छ, 'सरकारविरुद्ध विभिन्न अनुचित भेटघाट, गोप्य र रहस्यमय बैठकहरू आआफ्ना निवासमा आयोजना गरिरहने, यो के रवैया हो ? राज्यका प्राप्त पद र हैसियत धान्न आवश्यक योग्यता, क्षमता, हैसियत, जवाफदेहिता र जिम्मेवारीबोधको कमी, अभाव र हैसियतको दुरुपयोगको समस्या नै देखिएको हो कि यो खासमा के हो ?'