मध्यपश्चिमाञ्चल विश्वविद्यालय ‘स्कुल अफ ल’अन्तर्गत स्नातक तह (बिए एलएलबी)को नयाँ भर्नाका लागि भएको प्रवेश परीक्षा विवादमा परेको छ । फागुन १७, १८ र १९ गते लिखित र मौखिक परीक्षा हुनुपूर्व नै प्रश्नपत्र बाहिरिएको भन्दै अनुत्तीर्ण भएका विद्यार्थीले पुनः परीक्षा गराउन माग गरेका थिए । 

विद्यार्थीहरुले पक्षपातपूर्ण व्यवहार भएकाले छानबिनको माग गर्दै दिएको पत्रका आधारमा विश्वविद्यालयले २५ फागुनमा छानबिन समिति गठन गरेको थियो । समितिमा परीक्षा नियन्त्रण कार्यालयका प्रमुख डा. आनन्दप्रसाद सुवेदीको संयोजकत्वमा उपप्रााध्यापक नरेन्द्र साउद र अधिवक्ता दुर्गा सापकोटा सदस्य थिए । 

छानबिन समितिको प्रतिवेदनका आधारमा बुधबार क्याम्पस प्रशासनले सो परीक्षा रद्द गरेर परीक्षाको नयाँ मिति तोकेर सूचना जारी गरेको छ । क्याम्पस प्रशासनले विनाकारण प्रवेश परीक्षा रद्द गरेको भन्दै उत्तीर्ण विद्यार्थी उपकुलपतिको कार्यालयमा धर्नामा बसेका छन् । 

छानबिन समितिको प्रतिवेदन सार्वजनिक नगरी सानो सूचनाको भरमा परीक्षा रद्द गर्न नमिल्ने उनीहरुको भनाइ छ । बुधबार राति अबेरसम्म धर्नामा बसेका विद्यार्थी बिहीबार पनि धर्नामा छन् । आन्दोलनरत विद्यार्थीको नेपाल विद्यार्थी संघ र स्वतन्त्र विद्यार्थी युनियनले ऐक्यबद्धता जनाएका छन् । 
 
नेपाल विद्यार्थी संघका नेता राजन केसीले आफ्ना स्वार्थ पूरा गर्न छानबिन समितिको प्रतिवेदन सार्वजनिक नगरी सूचनाका भरमा परीक्षा रद्द गरिएको आरोप लगाए । ‘छानबिन समितिले ७२ पृष्ठ लामो प्रतिवेदन बुझाएको सुनेका छौँ । तर, त्यो हामीलाई उपकुलपति कार्यालयले उपलब्ध गराएको छैन । किन परीक्षा रद्द गरियो भन्दा विश्वविद्यालय प्रशासन मौन छ ।’

यसअघि विद्यार्थीले बुधबार ल क्याम्पसमा तालाबन्दी गरेका थिए । सो ताला क्याम्पस प्रशासनले फुटाएको थियो । 

विश्वविद्यालयले छानबिन समितिको प्रतिवेदनका आधारमा भन्दै ‘स्कुल अफ ल’का निर्देशक अर्जुन एइडी र उप–प्राध्यापक सुजन पन्तलाई कारबाही गरेको छ । एइडीको ठाउँमा विश्वविद्यालयले उपेन्द्र बहादुर विकलाई नियुक्त गरेको छ । विनाविज्ञापन पहुँचका आधारमा नियुक्ति गरिएको भन्दै विद्यार्थीले त्यसमा पनि विरोध जनाएका छन् । 

तत्काल परीक्षा गराउन माग

‘स्कुल अफ ल’को प्रवेश परीक्षाको नतिजा आएदेखि नै असन्तुष्ट रहेका अनुत्तीर्ण विद्यार्थीले तत्काल पुनः परीक्षा गराउन माग गरेका छन् । फागुन २१ गते परीक्षाको नतिजा आए यतादेखि नै पुनः परीक्षा गराउन माग गर्दै आएका विद्यार्थीले परीक्षा रद्द गरेर पुनः गराउने निर्णयलाई स्वागत गरेका छन् । 

बिहीबार ज्ञापन पत्र बुझाउँदै संघर्ष समितिका संयोजक कलम थापाले खारेज गरिएको प्रवेश परीक्षा छिटोभन्दा छिटो नयाँ मिति तोकेर सञ्चालन गर्नुपर्ने बताए । प्रवेश परीक्षाको प्रश्नपत्र निर्माण गर्ने र अन्तर्वातामा रहने प्राध्यापक कुनै पनि निजी कलेजमा संग्लग्न नभएको हुनुपर्ने उनीहरुको माग छ ।