भारतको राजधानी नयाँ दिल्लीमा अधिकांश मासु पसलहरू दुई दिनदेखि बन्द छन् ।
नौ दिनसम्म मनाइने हिन्दुहरूको पर्व नवरात्रिको अवसरमा सथानीय अधिकारीहरूकाे निर्देशनमा मासु पसल बन्द भएका हुन् ।
तर, मासु पसल बन्द गर्न दिइएको निर्देशनलाई लिएर त्यसको चर्को आलोचना भएको छ ।
चाडपर्वको समयमा अधिकांश मानिसहरुले मासु नखाने दक्षिण तथा पूर्वी जिल्लाका मेयरहरूले बताएका छन् ।
नवरात्रिमा पसलमा खुलम खुला मासु काटेको आफूले देख्न नसकेको धेरैले बताएका थिए ।
तर, समाजिक सञ्जालमा यसको चर्को विरोध भएको छ । यसले भारतको बहुलवाद उल्लंघन गरेको धेरैले गुनासो गरेका छन् ।
महिषासुर र दानवमाथि देवी दुर्गाको विजय उत्सवको रुपमा नवरात्रि मनाइन्छ ।
नौ दिनको चाडको समयमा हिन्दु भक्तजनहरू सामान्यतया उपवास बस्छन् । उनीहरूले मासु खाँदैनन् भने खानामा लसुन, प्याज प्रयोग गर्दैनन् ।
नयाँ दिल्लीमा मुख्यमन्त्री अरविन्द केजरीवालको आम आदमी पार्टीको सरकार छ । दिल्ली सरकारले मासु पसलहरू बन्द गर्न कुनै आधिकारिक आदेश जारी गरेको छैन ।
११ अप्रिलसम्म पसलहरू बन्द राख्न आह्वान गर्ने मेयरहरू प्रधानमन्त्री नरेन्द्र मोदीको हिन्दु राष्ट्रवादी भारतीय जनता पार्टी (बिजेपी) का हुन् । तर उनीहरूको आह्वानको तीव्र आलोचना भइरहेको छ ।
सांसद र तृणमूल कंग्रेस पार्टीका नेता महुआ मोइत्राले भने, ‘संविधानले मलाई मन परेको बेला खाना खान अनुमति दिन्छ । ’
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।