दैलेखको ठाटीकाँध गाउँपालिकाले करार कर्मचारी हटाएपछि एमालेले विरोध गरेको छ । नेकपा (एमाले) ठाटीकाँध गाउँपालिका कमिटीले बिहीबार विज्ञप्ति जारी गर्दै विरोध जनाएको हो ।
एमालेले ठाटीकाँध गाउँपालिकाले राजनीतिक प्रतिशोधका आधारमा सत्ता र शक्तिको दुरुपयोग गरेको भन्दै आरोप लगाएको छ । गत असार २८ गते ठाटीकाँध गाउँपालिकाले एक सूचना जारी गर्दै विगतको सरकारले स्थानीय तहमा कर्मचारी अभावमा नियुक्ति गरेका कर्मचारीलाई नियमित कार्य सञ्चालन गर्न कठिनाइ भएको भन्दै करारका कर्मचारीलाई हटाएको थियो ।
उक्त विषयलाई लिएर एमाले ठाटीकाँध गाउँपालिका कमिटी अध्यक्ष कुमारविक्रम शाहीले विभिन्न समयमा प्रक्रिया पूरा गरी रिक्त दरबन्दीमा करार सेवामा नियुक्ति प्राप्तका करार कर्मचारीलाई करार सम्झौतासम्बन्धी मापदण्ड २०७८ को नियम विपरीत हटाएको भन्दै विरोध जनाए । उनले भने, ‘पालिकाले गरेको कर्मचारीको करार म्याद थप नगर्ने निर्णयप्रति हाम्रो पार्टीले घोर भर्त्सना गर्दछ ।’
यस्तै, एमालेले संघीय सरकारमार्फत पालिकामा लामो समयदेखि अस्थायी दरबन्दीमा नियुक्ति भई विभिन्न विषयगत शाखामा कार्यरत कर्मचारीको कार्यसम्पादन, स्तर, मूल्यांकन तथा थप नयाँ अवधिको लागि राजनीतिक आग्रह र पूर्वाग्रहबाट स्थानीय सरकार सञ्चालन गर्न खोज्नु स्थानीय सरकार र स्थानीय जनताको भावनाविपरीतको कार्य भएको ठहर गरेको छ ।
एमालेले गैर–राजनीतिक क्रियाकलाप यथाशीघ्र बन्द गर्न स्थानीय सरकार लाई ध्यानाकर्षणसमेत गराएको छ । साथै पालिकामा यसअघि कामकाज गरिरहेका करार कर्मचारीलाई काममा निरन्तरता दिन आग्रह गरेको छ ।
यदि पालिकाले कुनै पनि सुनुवाइ नगरेमा र राजनीतिक प्रतिशोधका आधारमा सत्ता र शक्तिको दुरुपयोग गरेमा न्याय र समानताको लागि एमाले ठाटीकाँधले जस्तोसुकै कदम चाल्ने चेतावनी दिएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
