चीनमा जारी १९औँ एसियन गेम्सको क्रिकेट प्रतिस्पर्धाको क्वाटरफाइलमा भारतले दिएको २ सय ३ रनको लक्ष्य पछ्याउनेक्रममा नेपालले पहिलो विकेट गुमाएको छ । नेपालले पहिलो विकेटको रूपमा आसिफ शेखलाई गुमाएको हो । 

उनले ६ बलमा एक छक्का र एक चौकासहित १० रन मात्र बनाउन सके । आसिफ आवेश खानको बलमा आउट भएका हुन् । त्यसअघि टस जितेर ब्याटिङ रोजेको भारतले निर्धारित २० ओभरमा ४ विकेट गुमाएर २ सय २ रन बनायो । उसका लागि ओपनिङ ब्याटर यशस्वी जैसवालले शतकीय इनिङ खेले । 

उनले ४९ बलमा ७ छक्का र ८ चौकाको मद्दतमा शतकीय पारी खेलेका हुन् ।  टी–२० अन्तर्राष्ट्रियमा जैसवालको यो पहिलो शतक हो । यस्तै, रिंकु सिंहले अविजित ३५, शिवम दुबे, कप्तान ऋतुराज गायकवाडले २५/२५ रन जोडे । जितेश शर्मा ५ र तिलक वर्मा भने २ रनमै आउट भए । 

नेपालका लागि दीपेन्द्र सिंह ऐरीले दुई, सन्दीप लामिछाने र सोमपाल कामीले एक/एक विकेट लिए । नेपालले आज प्लेइङ–११ मा एक खेलाडी परिवर्तन गरेको छ । नेपालले आज विनोद भण्डारीलाई बाहिर राख्दै करण केसीलाई मौका दिएको हो । 

हाल नेपाली टिम उच्च लयमा छ । केही साताअघि मात्र नेपालले भारतको सिनियर टिमविरुद्ध राम्रो ब्याटिङ गरेको थियो । यस्तै, नेपालले जारी एसियन गेम्सको समूह चरणमा पनि उत्कृष्ट प्रदर्शन गरेको थियो ।  

समूह चरणमा नेपालले मंगोलियालाई २ सय ७३ तथा माल्दिभ्सलाई १ सय ३८ रनले हराएको थियो । नेपाल भारतविरुद्ध पनि सोही लय कायम राख्न चाहन्छ । भारतले पहिलोपटक एसियन गेम्समा क्रिकेट खेलिरहेको हो । 

यसअघिको दुई संस्करणमा उसले सहभागिता जनाएको थियो । भारत पहिलो खेलमै नेपाललाई हराउँदै सेमिफाइनलको यात्रा गर्ने रणनीतिमा छ । 

नेपाल भारतलाई हराउँदै पहिलोपटक सेमिफाइनलको टिकट काट्ने दाउमा छ । यसअघिको दुई संस्करणमा नेपाल क्वाटरफलबाटै बाहिरिएको थियो ।   

नेपालको प्लेइङ–११ : कुशल भुर्तेल, आसिफ शेख (विकेटकिपर), रोहित पौडेल (कप्तान), कुशल मल्ल, दीपेन्द्र सिंह ऐरी, सन्दीप जोरा, गुल्सन झा, सोमपाल कामी, करण केसी, सन्दीप लामिछाने र अविनाश बोहरा ।  

भारतको प्लेइङ–११ : रुतुराज गायकवाड (कप्तान), यशस्वी जैसवाल, तिलक वर्मा, शिवम दुबे, रिंकु सिंह, जितेश शर्मा (विकेटकिपर), वाशिङ्टन सुन्दर, आर साई किशोर, रवि बिश्नोई, आवेश खान र अर्शदीप सिंह ।