राष्ट्रिय प्रजातन्त्र पार्टीले प्रतिनिधिसभा बैठकको नियमित कार्यसूची हटाएर इजरायलमा अलपत्र नेपालीहरूको उद्धारको विषयमा छलफल चलाउन माग गरेको छ । प्रतिनिधिसभाको बैठक आज दिउँसो ३:३० मा बस्ने गरी बोलाइएको छ । 

राष्ट्रिय प्रजातन्त्र पार्टीले आजै सभामुख देवराज घिमिरेलाई भेटी प्रतिनिधि सभा बैठकको नियमित कार्यसूचीलाई हटाएर इजरायलमा अलपत्र नेपालीहरूको उद्धारको विषयमा मात्र बैठक केन्द्रित गर्न माग गरेको हो । सिंहदरबारस्थित सभामुख घिमिरेको कार्यकक्षमा पुगेर राप्रपा प्रमुख सचेतक ज्ञानबहादुर शाही नेतृत्वको टोलीले बैठकको कार्यसूची परिवर्तन गर्न माग गरेका हुन् ।

इजरायलमा अलपत्र नेपालीहरूको उद्धारका लागि सरकारले विशेष टिम बनाउनुपर्ने र त्यसको लागि प्रतिनिधि सभाले निर्देशन दिनुपर्ने उनले बताए । इजरायलमा मात्रै नभई अन्य विभिन्न देशहरूमा पनि अलपत्र रहेका नेपालीहरूको उद्धार गर्नुपर्ने माग उनले गरे । 

सभामुखसँगको भेटपछि सञ्चारकर्मीहरूसँग कुराकानी गर्दै उनले भने, ‘आजको नियमित संसदलाई स्थगन गरेर इजरायलमा अलपत्र परेका मान्छेलाई उद्धार गर्नका लागि सदन चलाऔँ । आजको विषयवस्तु यही विषयवस्तु मात्रै राखौँ । कसरी मान्छेलाई त्यहाँबाट उद्धार गर्ने ? आज इजरायलमा मात्र होइन साउदी अरबमा, दुई, कतार, मलेसिया लगायत युरोपियन, क्षणिक अफ्रिकन देशहरू लगायत धेरै देशहरूमा अहिले नेपालीहरू अलपत्र परेका छन् । उनीहरूको उद्धारका लागि एउटा विशेष टिम सरकारले बनाउनुपर्छ । त्यो बनाउनका लागि संसदबाटै आदेश जारी होस् । र आज चलिरहेको संसदलाई नियमित कार्यसूचीलाई पछाडि राखेर आजको सदन विदेशमा अलपत्र परेका नेपालीहरूको उद्धारका लागि आजको सदन चलाऔँ । त्यही विषयमा सरकारलाई आदेश गरौँ ।’

सभामुख घिमिरेले सबै राजनीतिक दलका प्रमुख सचेतकहरूसँग साझा रूपमा छलफल गरी बैठकको कार्यसूची तय गर्ने बताएको उनले जानकारी दिए ।