राष्ट्रिय ट्रमा सेन्टरमा उपचारका लागि आएकामध्ये ८० प्रतिशत बिरामीको अप्रेसन हुने गरेको छ । ट्रमा सेन्टरका निर्देशक डा.बद्री रिजालले अस्पतालमा दैनिक करिव चार सय ५० देखि पाँच सयजना बिरामी आउने गरेको र त्यसमध्ये ८० प्रतिशतको अप्रेसन गर्नुपर्ने जानकारी दिए ।
हाल अस्पतालमा दैनिक २५ देखि ३० जनाको अप्रेसन हुँदै आएको छ । उनले अस्पतालमा बिरामीको चाप हुने गरेकाले दुई सय १८ शैय्या सञ्चालनमा रहेको जानकारी दिए । डा.रिजालले सेवा प्रवाहलाई चुुस्त दुरुस्त बनाउन जनशक्ति अभाव भएको बताए । झन्डै तीन सयजनाको हाराहारीमा स्थायी दरबन्दी र आन्तरिक स्रोत लगायतबाट झन्डै तीन सय गरी ६ सय जना कर्मचारी कार्यरत रहेको भए पनि दरबन्दी पर्याप्त नहुँदा एकजना चिकित्सकले तीनदेखि चारजना बिरामीलाई हेर्नुपर्ने बाध्यता रहेको उनले बताए ।
अस्पतालमा एक सयजना चिकित्सक र दुई सय ५० जना नर्स कार्यरत छन् । अस्पतालभित्रै सबैजसो औषधि उपलब्ध हुनेगरी व्यवस्थापन गरिएको उनले जानकारी दिए । आफू वार्डहरुको स्तरोन्नति गर्नेतर्फ लागिरहेको बताउँदै उनले अहिले अनलाइन टिकट लिने व्यवस्था मिलाइएको र बिहान आठ बजेदेखि नै अस्पतालको सेवा प्रवाह हुँदै आएको बताए ।
‘आइसियू बेड १० वटा भएकोमा १ थप गरी ११ वटा आइसियू बेड र ८ वटा एचडियू बेड थप गरी १९ वटा बेड आइसियूबराबरको सेवा सञ्चालन भइरहेको छ,’ डा.रिजालले भने, डा.रिजालले भने, ‘वार्डहरुको स्तरोन्नति गर्नेतर्फ लागिरहेका छौँ । अहिले तीन ठाउँमा फार्मेसी सञ्चालनमा छन् । अहिले लगभग सबैजसो औषधि उपलब्ध हुनेगरी व्यवस्थापन गरिएको छ ।’
ट्रमा भएर आइसकेपछि रेनर फेलरतर्फ जान थाल्यो भने केही बिरामीलाई डायलायसिस गर्नुपर्ने उनले बताए । ‘त्यस्तोको लागि इमरजेन्सीको लागि आइसियूमा एउटा बेडमा एउटा डायलायसिस मेसिन जोड्दैछाँै,’ उनले भने, ‘ट्रमा सेन्टरमा दैनिक साढे तीन सयजना ओपिडीमा बिरामी आउनुहुन्छ । इमरजेन्सीमा एक सयदेखि एक सय ५० जना आउनुहुन्छ । लगभग चार सय ५० देखि पाँच सय बिरामीहरु हेरिरहेका छौँ ।’
बिरामीको लोड बढेको कारणले अहिले २१८ बेड सञ्चालन गरिरहेको उनले जानकारी दिए । ‘ट्रमामा आएकामध्ये ८० प्रतिशतलाई अप्रेसन गर्नुपर्ने हुन्छ,’ उनले भने, ‘त्यसको लागि हामी कहाँ पोष्टप बेडको पनि समस्या छ ।’
अहिले ट्रमामा ६ सय जना कर्मचारी छन् । तीन सयजनाको हाराहारीमा स्थायी दरबन्दी छ भने अरु आउट सोर्सिङ गर्ने स्टाफ र आन्तरिक स्रोतबाट हो । जनशक्ति बढ्यो भने सेवा प्रवाहमा थप वृद्धि गर्न पनि सहज हुने उनले बताए ।
डा.रिजालले ट्रमाका लागि अति आवश्यक मानिएको रिहाब सेन्टर सरकारी तवरबाट नहुँदा बिरामीहरु मर्कामा परेको गुनासो गरे । सरकारी तवरमा रिहाब सेन्टर नहुँदा निजीमा पठाउन बाध्य भएको भन्दै उनले त्यसका लागि लबिइङ गरिरहेको बताए । स्पाइन इन्जुरी, ढाडमा चोट लागेर खुट्टा, हात नचल्ने भएर आएका बिरामी अप्रेसन गरिसकेपछि पुनःस्थापनाका लागि रिहाब सेन्टरमा जानुपर्ने उनको भनाइ छ । ट्रमा सेन्टरमा इन्जुरी भएका (स्पाइन, स्पोर्टस, घोडाको चोट, ढाडको चोट) हरुका लागि आवश्यक पर्ने एमआरआई मेसिन नहुँदा समस्या भएको उनले बताए ।
एमआरआई मेसिन नहुँदा बिरामीलाई अन्यत्र पठाउनुपर्ने र महँगो शुल्क तिरेर सेवा लिनुपर्ने बाध्यता रहेको भन्दै उनले अस्पतालमा कार्यरत जनशक्तिको क्षमता अभिवृद्धिका लागि तालिम सञ्चालन गरिने बताए । डा.रिजालले ट्रमाका बिरामीलाई मध्यनजर गर्दै फिजियोथेरापी सेवा बिस्तार गर्ने योजना रहेको जानकारी दिए ।
बिरामीहरुलाई छिटो छरितो सेवा प्रवाह गर्नेतर्फ अस्पताल तल्लीन रहेको उनको दाबी छ । कुनै पनि बिरामी अस्पतालभित्र उपचार पाएर दुई हप्ताभित्र जसरी पनि फर्किने गरेको डा. रिजालले जानकारी दिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।