अमेरिकी गायिका एवं पप आइकन ब्रिटनी स्पेयर्सले इन्स्टाग्राम र संगीतबाट अलग हुने घोषणा गरेकी छन् । उनको प्रख्यात गीत ‘टक्सिक’ले २० वर्ष पूरा गरेको अवसरमा उनले यस्तो घोषणा गरेको आइएएनएसलेजनाएको छ ।
४२ वर्षीया ब्रिटनीले यस्तो घोषणा गरेको केही दिनपछि नै उनले सामाजिक सञ्जालमा रहेका आफ्नो एकाउन्ट हटाएकी छन् । उनले आफूले पुनः संगीत सिर्जना नगर्ने र सदाका लागि संगीत उद्योग छाडेको बताएकी हुन् ।
ब्रिटनीका ४३ मिलियन फलोअर्स छन् । ब्रिटनीको यस्तो घोषणाले उनका शुभेच्छुकले निराश भएको प्रतिक्रिया दिएका छन् । उनले सञ्जालबाट हटाएको एक पोस्टमा संगीत सिर्जनाका लागि रेकर्डिङ स्टुडियोमा आफू नफकर्ने खुलासा गरेकी थिइन् । उनले आफू पर्दा पछाडि रहेर काम गर्न र अन्य कलाकारका लागि गीत लेख्नमा नै खुसी रहेको उल्लेख गरेकी थिइन् ।
‘जब म लेख्छु, त्यो केवल मनोरञ्जनका लागि लेख्छु या अन्य मानिसका लागि लेख्छु । मैले पछिल्लो दुई वर्षमा अन्य मानिसका लागि २० भन्दा बढी गीत लेखेँ । म एक घोस्ट राइटर हुँ र म इमानदारीपूर्वक यसमा आनन्द लिन्छु’, ब्रिटनीले भनेकी छन् ।
केही समयअघि ब्रिटनीले चाली एक्ससिएक्स र जुलया माइकल्ससँग सहकार्य गर्दै नयाँ एल्बमको तयारी गरिरहेको समाचार सार्वजनिक भएको थियो । तर, दुई बच्चाकी आमा ब्रिटनीले यो समाचारलाई ‘बकबास’ भन्दै खण्डन गरेकी थिइन् ।
सन् २०२१ मा पिताको संरक्षकत्वबाट स्वतन्त्र भएकी ब्रिटनीले त्यही बेला संगीत उद्योग छाड्ने प्रतिक्रिया दिएकी थिइन् । पछिल्लो समय एल्टन जोनको सहयोगले ट्रयाक ‘होल्ड मी क्लोजर’ जारी गरेकी थिइन् । तर, त्यसपछि भने उनले अहिलेसम्म कुनै नयाँ संगीत रेकर्ड गराएकी छैनन् । उनको पछिल्लो एल्बम ‘ग्लोरी’ सन् २०१६ मा रिलिज भएको थियो ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
