नेपाली कांग्रेस केन्द्रीय सदस्य तथा प्रचार विभाग प्रमुख मीन विश्वकर्माले हालै सम्पन्न राष्ट्रिय सभा निर्वाचनमा गठबन्धनले उठाएका उम्मेदवारमाथि भएको घात र धोका सम्बन्धमा छानबिन गर्ने बताएका छन् ।
समुदायमा कांग्रेस अभियानअन्तर्गत प्रतिनिधिका रूपमा इलाम पुगेका उनले निर्वाचनका बेला भएको धोकालाई पार्टीले गम्भीर रुपमा लिएको भन्दै छानबिन गर्ने बताएका हुन् ।
माघ ११ गते भएको निर्वाचनमा कोशी प्रदेशमा गठनबन्धनबाट उम्मेदवारी दिएका कांग्रेस उम्मेदवारले जितेका थिए भने माओवादी उम्मेदवार पराजित थिए ।
कोशी प्रदेशलगायत देशैभर केही अन्तर्घात भएको भन्दै उनले गठबन्धनमा सामेल भएपछि मिलेर जानुपर्ने, तर धोका दिन नहुने बताए ।
विश्वकर्माले सरकारमा पुगेपछि जनप्रतिनिधिले सपना पूरा गर्नभन्दा पनि योजना बनाउनतिर लाग्नुपर्ने पनि बताए । धेरै जनप्रतिनिधि लाभको पदमा पुगेपछि सपना पूरा गर्ने सोचतिर गएकाले व्यवस्था नै धरापमा पर्ने स्थिति आएको भन्दै उनले जनताका काममा लाग्नुपर्नेमा जोड दिए ।
समुदायमा कांग्रेस अभियान अन्तर्गत इलामका गाउँ–गाउँ र सबै वडामा पुगेर जनतासमक्ष सुझाव लिने र उठेका प्रश्नको जवाफ दिने उनले बताए ।
‘नेपाली कांग्रेसप्रति जनताको बुझाइ के छ, सरकारले जनताको पिरमर्का कति सम्बोधन गरेको छलगायतका विषयमा अभियान केन्द्रित रहनेछ,’ उनले भने ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।