काठमाडौं– ७ देखि १४ वैशाखसम्म हुने एनसिएल महिला टी–२० किक्रेट प्रतियोगिताको अक्सन सकिएको छ । अक्सनमा १० खेलाडीमाथि अधिकतम मूल्य ७५ हजारको बोली लागेको छ । अधिकतम बोली लाग्ने सबैलाई गोलाप्रथाबाट ४ टिममा बाँडिएको छ ।
एउटै खेलाडीमाथि एकभन्दा बढी टिमले अधिकतम बोली लगाएमा गोला प्रथाबाट खेलाडी छनोट गरिन्छ ।
४ टिम सहभागी हुने उक्त प्रतियोगितामा आज सबै टिमले १३/१३ जना खेलाडी अनुबन्ध गरेका हुन् । एउटा टिमले बढीमा ६ लाख ५० हजारसम्म खेलाडीको लागि खर्च गर्न पाउने व्यवस्था छ ।
नेपाली राष्ट्रिय महिला टोलीकी कप्तान रुविना क्षेत्री मार्की खेलाडी रहेको भैरहवा क्विन्सले ३ खेलाडीलाई ७५/७५ हजार खर्च गरेको छ । उसले सुनु खड्का, इन्दु वेर्मी र विन्दु रावलाई अधिकतम मूल्य ७५ हजारमा भित्र्याएको हो । टिमले १३ खेलाडीका लागि जम्मा ५ लाख ५० हजार खर्च गरेको छ ।
करुना भण्डारी मार्की खेलाडी भएको विराटनगर रोअरिङ लायोन्सले पनि २ खेलाडीलाई ७५/७५ हजार खर्च गरेको छ । उसले काजोल श्रेष्ठ र अप्सरी वेगमलाई अधिकतम मूल्य तिरेको हो ।
लायोन्सले १३ खेलाडीका लागि जम्मा ५ लाख २० हजार खर्चिएको छ ।
यस्तै, सीता रानामगर मार्की प्लेयर भएको धनगढी वन्डर वुमनले पनि २ खेलाडीलाई ७५ हजार तिरेको छ । उसले कविता कुन्वर र ज्योती पाण्डेलाई ७५/७५ हजार तिरेर आफ्नो टिममा भित्र्याएको हो ।
यो टिमले १३ खेलाडीका लागि जम्मा ५ लाख ५ हजार खर्चिएको छ ।
रेखा थापाले लगानी गरेको काठमाडौं सुपर च्याम्पियन्समा नेरी थापा मार्की खेलाडी छिन् । यस टिमले ममता चौधरी, सरिता मगर र रोमा थापालाई ७५/७५ हजार तिरेर खरिद गरेको छ । काठमाडौंले १३ जनाको लागि ५ लाख ७० हजार रुपैयाँ खर्चिएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
