बागमती प्रदेशका मुख्यमन्त्री शालिकराम जम्कट्टेलले आज विश्वासको मत लिने तयारी गरेका छन्, जसका लागि बागमती प्रदेशसभाका सभामुख भुवनकुमार पाठकले प्रदेशसभाको बैठक दिउँसो १ बजेका लागि बोलाएका छन् ।
मुख्यमन्त्री जम्कट्टेलले विश्वासको मत लिन आटेपछि सोबारे छलफल गर्न बैठक बोलाएको पाठकले जानकारी दिए । बागमतीमा नेपाली कांग्रेस सरकारबाट बाहिरिँदै समर्थन फिर्ता लिएपछि मुख्यमन्त्री जम्कट्टेल अल्पमतमा परेका छन् ।
सरकारमा सहभागी दलले समर्थन फिर्ता लिएमा ३० दिनभित्र विश्वासको मत लिनुपर्ने संवैधानिक व्यवस्थाअनुसार मुख्यमन्त्री जम्कट्टेलले समय सकिन तीन दिन अगावै (२२ चैतभित्र) आज विश्वासको मत लिने तयारी गरेका हुन् ।
नेकपा माओवादी केन्द्रबाट मुख्यमन्त्री बनेका जम्कट्टेलको दलले विश्वासको मत लिनेसम्बन्धी प्रस्ताव प्रदेशसभा सचिवालयमा यसअघि नै दर्ता गराइसकेका छन् । माओवादीका सचेतक रत्नप्रसाद ढकालले गत शुक्रबार नै प्रस्ताव दर्ता गराएका थिए ।
१ सय १० सदस्यीय प्रदेशसभामा विश्वासको मतको लागि जम्कट्टेलको ५६ मत आवश्यक पर्छ। प्रदेशसभामा एमालेको २७, माओवादी केन्द्रको २१, एकीकृत समाजवादीको ७ र हाम्रो नेपाली पार्टीको २ सिट छ । ३ सांसद रहेको नेमकिपाले विपक्षमा मतदान गर्ने निर्णय गरिसकेको । कांग्रेसका ३७ र राप्रपाका १३ जना सांसद विपक्षमा छन् ।
सत्ता समीकरणमा सहभागी मध्ये नेकपा एमाले, माओवादी केन्द्र, र हाम्रो नेपाली पार्टीबीच मुख्यमन्त्रीलाई विश्वासको मत दिने सहमति भएको भनिए पनि एकीकृत समाजवादीले भने जम्कट्टेललाई मत दिन चाहेको छैन ।
एसले बागमती वा कोशीमा आफूले मुख्यमन्त्री पाउनुपर्ने माग गरेको छ । मुख्यमन्त्री माग गर्दै बागमतीमा जमकट्टेललाई समर्थन गर्ने स्पष्ट नपारेको एसको कोशीमा ४ सीट छ भने बागमतीमा सात सीट छ ।
बागमतीमा एमाले,माओवादी र हाम्रो नेपाल पार्टीको गरी ५० सिट छ । आज मुख्यमन्त्रीलाई विश्वासको मत पाउन ५६ मत चाहिन्छ । यस्तो अवस्थामा एसले समर्थन नदिने हो भने मुख्यमन्त्रीले विश्वासको मत नपाउने निश्चितजस्तै छ । यसरी हेर्दा जमकट्टेलको मुख्यमन्त्री पद नेकपा एसको हातमा देखिन्छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
