विगतमा भारतले लगाएको नाकाबन्दी तथा पछिल्लो समय महामारीका रूपमा फैलिएको कोरोना भाइरसका कारण लामो समयदेखि प्रभावित दुई ठूला अन्तर्राष्ट्रिय विमानस्थलको निर्माण सम्पन्न नहुँदै उद्घाटनको तयारी अघि बढेको छ । उक्त दुई ठूला विमानस्थलको उद्घाटन प्रधानमन्त्री केपी शर्मा ओलीले गर्ने तयारी अघि बढेको हो ।
पछिल्लो समय भैरहवामा निर्माणाधीन गौतमबुद्ध अन्तर्राष्ट्रिय विमानस्थल र पोखरास्थित क्षेत्रीय अन्तर्राष्ट्रिय विमानस्थलको निर्माण भइरहेको छ । यी दुवै विमानस्थलको निर्माण अन्तिम चरणमा रहेको नेपाल नागरिक उड्डयन प्राधिकरणले जनाएको छ । प्राधिकरणका अनुसार आगामी वैशाखको पहिलो सातासम्ममा पूर्ण रूपमा निर्माण सम्पन्न गर्ने तयारीका साथ काम भइरहेको छ ।
यद्यपि प्रधानमन्त्री ओलीले भने उक्त दुई विमानस्थलको निर्माण सम्पन्न नभई उद्घाटन गर्ने भएका छन् । स्रोतका अनुसार प्रधानमन्त्री ओलीले आगामी वैशाख १ गते दुवै विमानस्थलको उद्घाटन गर्ने भएका छन् ।
प्रधानमन्त्री कार्यालयको निर्देशन अनुसार नै संस्कृति, पर्यटन तथा नागरिक उड्डयन मन्त्रालय तथा नागरिक उड्डयन प्राधिकरणले उद्घाटनको तयारी अघि बढाइसकेका छन् ।
मन्त्रालय स्रोतका अनुसार प्रधानमन्त्री कार्यालयको निर्देशनका आधारमा उद्घाटनको तयारी गरिएको हो । यसअघि नै प्रधानमन्त्रीले आन्तरिक उडान गर्नेगरी उद्घाटनको तयारी गरेकोमा मन्त्रालयले त्यसलाई रोकेको मन्त्रालयले जानकारी गराएको छ ।
निर्माण नै सम्पन्न नगरी हतार गरेर उद्घाटन गर्दा समस्या आउनसक्ने भन्दै यसअघि विमानस्थल उद्घाटन गर्न रोकिएको थियो । अहिले पुनः उद्घाटनको तयारी भएको छ । विभिन्न अवरोधका कारण लामो समयदेखि विमानस्थल निर्माण सम्पन्न हुन सकेको छैन, उद्घाटन भएपछि निर्माण रोकिने देखिएको स्रोतको भनाइ छ ।
प्राविधिक कामदार निर्माण क्षेत्रमा नआउँदा एक वर्षदेखि उपकरण जडान लगायतको काम रोकिएको छ । निरन्तर रूपमा काम भएमा निर्माणको अन्तिम चरणमा पुगेको भैरहवा विमानस्थल सञ्चालनमा आउन अझै ६ महिना लाग्छ, काम सक्ने तयारी नगरी उद्घाटनको हतारो मात्र भएको मन्त्रालयका केही अधिकारी बताउँछन् ।
त्यस्तै गौतमबुद्ध विमानस्थल निर्माणको अन्तिम चरणमा पुगे पनि भारत सरकारले अझैसम्म उडानका लागि आवश्यक पर्ने हवाई रुट दिएको छैन । भारत सरकारले उडानको अनुमति नदिँदा हाल नेपालीसहित नेपाल आउने वायुसेवा कम्पनीहरूले लामो दूरीमार्फत उडान गर्नुपर्ने बाध्यता रहेको छ । तसर्थ भारत सरकारले हवाई रुट प्रदान नगरेसम्म उक्त विमानस्थलबाट कुनै पनि उडान गर्न सक्ने अवस्था छैन ।
सन् २०१५ बाट निर्माण सुरु भएको गौतमबुद्ध अन्तर्राष्ट्रिय विमानस्थल ९३ प्रतिशत सम्पन्न भएको छ । निर्माणको सबै काम सकिए पनि उपकरण जडान गर्ने प्राविधिक नहुँदा विगत एक वर्ष अघिदेखि निर्माण प्रभावित हुँदै आएको छ ।
त्यसैगरी, सन् २०२१ जुलाई १० भित्रमा सम्पन्न गर्नेगरी २०७४ सालमा निर्माण सुरु भएको पोखरा क्षेत्रीय अन्तर्राष्ट्रिय विमानस्थलको निर्माण हाल ७० प्रतिशतको हाराहारीमा सम्पन्न भएको छ । सम्झौता अवधिभन्दा ६ महिनाअघि नै काम सम्पन्न गर्ने तयारी भएको उक्त विमानस्थल निर्माणले कोरोना महामारीका कारण गति लिन सकेको छैन । कोरोनाका कारण एक वर्ष अघिदेखि निर्माण सुस्त गतिमा भइरहेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।