बिपी कोइराला स्वास्थ्य विज्ञान प्रतिष्ठानको सुधारको माग गर्दै आन्दोलनरत स्वास्थ्यकर्मीले वार्ताका लागि आएका प्रतिष्ठानका पदाधिकारीलाई तीन घण्टा थुनेर राखेका छन् ।
उपकुलपति डा. ज्ञानेन्द्र गिरीसँगै रेक्टर डा.गुरुप्रसाद खनाल, रजिस्ट्रार डा.मोहनचन्द्र रेग्मी, अस्पतालका डेपुटी उपनिर्देशक डा.दिव्यराज मिश्र, सहायक अस्पताल निर्देशक डा.प्रमोद बराललाई आन्दोलनकारीले उपकुलपतिको कार्यकक्षमा थुनेर राखेका हुन् ।
बिपी कोइराला स्वास्थ्य विज्ञान प्रतिष्ठान धरानका आन्दोलनरत पक्षसँग वार्ता गर्न आउँदा प्रतिष्ठानका उपकुलपति डा.ज्ञानेन्द्र गिरीले मदिरा सेवन गरेर आएको भन्दै आन्दोलनकारीले थुनेको बताएका छन् ।
सोमबार बेलुका संघर्ष समितिलाई वार्तामा बोलाएका उपकुलपति डा.गिरीले मादक पदार्थ(रक्सी) पिएको बेलामा जस्तो असामान्य भावमा बोल्न थालेपछि संघर्ष समितिले वार्ता छाडेको थियो ।
वार्तामा रक्सी पिएर उपकुलपति आएको र अन्य पदाधिकारी रमिते बनेको भन्दै आन्दोलनरत चिकित्सक, कर्मचारी तथा विद्यार्थी आक्रोशित छन् । आन्दोलनकारीले उपकुलपतिको मेडिकल जाँच गर्नुपर्ने भन्दै नाराबाजी गरिरहेका छन् ।
उपकुलपतिसहित चारैजना पदाधिकारीको राजीनामा वा बर्खास्ती नभएसम्म आन्दोलन नरोकिने संयुक्त संघर्ष समितिका सहसंयोजक डा.विष्णु पोखरेलले बताए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
