अर्थमन्त्री जनार्दन शर्माले श्रम, उत्पादन र रोजगारसहितको आर्थिक आत्मनिर्भरता नै समाजवादको मूल आधार भएको बताएका छन् ।
बुधबार नेकपा (माओवादी केन्द्र) रुकुम पश्चिम–काठमाडौं सम्पर्क समन्वय समितिको सम्मेलनलाई सम्बोधन गर्दै उनले लाखौँ युवालाई श्रम र उत्पादनमा जोडेर आत्मनिर्भर बनाउनुपर्नेमा जोड दिए । श्रम शक्तिलाई तालिम दिएर दक्ष बनाउने र रोजगारीमा लगाउने गरी प्रतिस्थापन बजेटमार्फत कार्यक्रम ल्याएको जानकारी दिँदै मन्त्री शर्माले यस्ता कार्यक्रमबाट अर्थतन्त्रलाई समाजवादको दिशातिर सोझ्याउन सहयोग पुग्ने विश्वास व्यक्त गरे ।
‘यो कार्यक्रम लागू गर्न युवाहरुले टोल–टोलमा नेतृत्व गर्नुपर्छ,’ उनले भने, ‘समाजवाद निर्माणको नेतृत्व तपाईंहरुले गर्ने हो, हामीले त्यसमा सहयोग गर्ने हो ।’
सरकारले पहिलोपटक गरिबलाई पाँच लाख, विपन्न परिवारलाई १० हजारका दरले राहत, दीर्घरोगीलाई मासिक उपचार खर्च, राजनीतिक आन्दोलनका सहिद परिवारलाई मासिक भत्ता दिनेजस्ता दीर्घकालीन महत्वका कार्यक्रम ल्याएको उनले जानकारी दिए ।
कुनै पनि हालतमा व्यक्तिगत स्वार्थमा केन्द्रित भएर काम नगर्ने प्रतिबद्धता बोकेर जिम्मेवारी सम्हालेको दाबी गर्दै मन्त्री शर्माले कहीँ कतै त्यस्तो पाइएमा निर्धक्कसँग आलोचना र भण्डाफोर गर्न सबैलाई आग्रह समेत गरे ।
कार्यक्रममा पूर्वमन्त्री सत्या पहाडी, पूर्व प्रदेशमन्त्री विमला केसी, माओवादी नेता डिलाराम आचार्यलगायतले वर्तमान सरकारले प्रतिस्थापन बजेटमार्फत ल्याएको कार्यक्रमले जनतामा नयाँ आशा जगाएको, सहिद परिवार, दीर्घरोगी तथा विपन्नहरुले देशमा सरकार छ भन्ने कुराको महसुस गर्न पाएको उल्लेख गर्दै प्रगतिशील कर प्रणालीमार्फत हुनेखानेबाट अलिकति लिएर हुँदा खानेलाई दिने नीति ल्याउन सुझाब दिए ।
फरकधारमा प्रकाशित कुनै समाचारमा तपाईंको गुनासो भए हामीलाई farakdhar@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
